Украина президенти Владимир Зеленский Олий Радага Эронга қарши 50 йил муддатга санкциялар жорий этишни таклиф қилувчи резолюция лойиҳасини тақдим этди.
Санкциялар, хусусан, Эрон резидентлари билан ҳарбий ва икки томонлама мақсадли товарлар савдосини тўлиқ тақиқлашни, технология ва интеллектуал мулк ҳуқуқларини Эрон резидентларига ўтказишни тақиқлашни назарда тутади. Бундан ташқари, Эрон резидентлари томонидан чиқарилган электрон тўлов воситаларига хизмат кўрсатишни тўхтатиш таклиф қилинмоқда.
Резолюция бўйича овоз бериш санаси ҳали белгиланмаган.
Эрон Россияга ўқ-дори ва Shahed камикадзе дронларини етказиб бермоқда. Ўтган ҳафта Владимир Зеленский Эрон фуқароларига мурожаат қилиб, уларни Украинадаги урушда Россия террорига шерик бўлмасликка чақирганди.
Аввалроқ The Wall Street Journal манбаларга таяниб, охирги олти ой ичида Эрон Россияга 300 мингга яқин артиллерия снарядлари ва миллионта ўқ-дори юборгани ҳақида хабар берганди.
2022 йил кузида Эрон Россияга “Фатеҳ-110” ва “Зулфиқор” баллистик ракеталарини етказиб бермоқчи экани маълум бўлганди. Март ойи бошида Financial Times газетаси Россиянинг кейин АҚШ Украинага узоқ масофага учувчи ATACMS ракеталарини етказиб бера бошлашидан қўрқиб, Эрондан ҳалигача баллистик ракета сотиб олмаётгани ҳақида ёзди.