Украинанинг Россияга қўшиб олинган Луганск, Донецк, Херсон ва Запорожье вилоятларининг Кремль томонидан тайинланган раҳбарлари Россия Марказий сайлов комиссиясига ушбу ҳудудларда сайловларни 2023 йил 10 сентябрда — ягона овоз бериш кунида ташкил этиш таклифи билан чиқди. Бу ҳақда “Коммерсант” манбаларга таяниб хабар берди, маълумотни МСК раиси ўринбосари Николай Булаев тасдиқлади.
Қўшиб олинган ҳудудлар вакиллари МСКга айнан қачон мурожаат қилгани номаълум, “Коммерсант” улар 12 июндан аввал сўров юборганини таъкидлади. Нашр суҳбатдошларидан бирининг сўзларига кўра, Марказий сайлов комиссияси Россия Мудофаа вазирлиги билан маслаҳатлашувлар ўтказгандан сўнг мурожаатларга жавоб беради (қонунга кўра, бунинг учун беш кун вақт берилади).
Кремлпараст “Мустақил жамоатчилик мониторинги” лойиҳаси экспертларининг таъкидлашича, Россиянинг барча бешта парламент партиялари аннексия қилинган ҳудудлардаги минтақавий ва муниципал сайлов кампанияларида иштирок этишини эълон қилган.
2022 йил октябрь ойида, Украинанинг тўрт вилояти аннексия қилинганидан кўп ўтмай, Россия президенти Владимир Путин ушбу ҳудудларда ҳарбий ҳолат жорий қилганди. Май ойида Давлат Думаси қонунга ҳарбий ҳолат амал қилаётган ҳудудларда сайлов ўтказишга рухсат берувчи тузатишлар киритди.
Изоҳ (0)