Ливаннинг Ан Наҳар газетаси 6 февралдаги зилзиладан уч ойдан кўпроқ вақт ўтиб, Сурия—Туркия чегараси яқинидаги вайроналар остидан тирик одам топилгани ҳақидаги хабарни рад этди. Бундай хабар “Akhbar.fouri” порталида эълон қилинганди, унда ер силкинишидан омон қолган эркакнинг сурати кўрсатилган.
Порталнинг таъкидлашича, суратда Идлиб вилоятидаги Хон Шайхун шаҳрида яшовчи 1984 йилда туғилган Аҳмад ал-Сусий тасвирланган. Унинг амакиваччаси суратни нашрга бериб, тўшакка михланиб қолган Сусийга одамлар эътиборини қаратмоқчи ва шу орқали унинг даволаниши учун пул тўпламоқчи бўлган.
Ан Наҳар газетаси беморнинг акаси билан боғланишга муваффақ бўлди, у Аҳмад ас-Суси ҳозир Кфар Желис қочқинлар лагерида истиқомат қилаётганини, унинг аҳволи жуда оғир эканини тасдиқлади. Унинг сўзларига кўра, “Akhbar.fouri” нашри эълон қилган сурат тахминан етти йил аввал олинган бўлиб, укасининг танасидаги яралар вайроналар остида уч ой қолганидан эмас, балки псориаз (юқумли бўлмаган тери касаллиги) туфайли пайдо бўлган.
Аввалроқ портал 16 май куни қутқарилган суриялик гўёки маҳаллий касалхонага олиб кетилгани ва шифокорлар назоратида экани, у узоқ реабилитациядан ўтиши ҳақида хабар берганди.
7 май куни Сурия Халқ Кенгашида (парламентида) сўзга чиққан бош вазир Ҳусайн Арнус зилзила оқибатлари ҳақида маълумот берган эди. Унинг айтишича, 6 февралдаги табиий офат оқибатида 225 минг оила жабр кўрган, 1 414 киши ҳалок бўлган, 2 367 киши жароҳатланган, 1 553 одам вайроналар остидан қутқарилган. “Жабрланганларнинг умумий сони 1 миллиондан ошди, уйидан айрилганлар вақтинчалик яшаш учун 32 та марказга жойлаштирилди”, — деди бош вазир.
Арнуснинг сўзларига кўра, техник экспертизадан сўнг Ҳалаб ва Латакия вилоятларидаги 216 мингта бинодан 9 мингдан ортиғи яшаш учун яроқсиз бўлиб қолгани ва бузиб ташлаш кераклиги аниқланган.
Изоҳ (0)