Япония иқтисодиёти 2023 йилнинг январидан мартигача аҳолининг садр ва игнабаргли дарахтлар гулчангларига аллергияси туфайли 383,1 миллиард иена (2,7 миллиард доллардан ортиқ) зарар кўрди. Бу ҳақда Daiichi Life суғурта компанияси қошидаги Иқтисодий тадқиқотлар институти ҳисоб-китобларига таяниб, Nikkei газетаси хабар бермоқда.
Тадқиқот муаллифи Тосихиро Нагаҳама иқтисодий йўқотишларни япон аҳолисининг баҳорда уйдан камроқ чиқиши билан боғлади. Шу тариқа умумий овқатланиш ва кўнгилочар тармоқларнинг даромадлари камайган, шунингдек, транспорт оқимлари қисқарган.
Японияда поллиноз (мавсумий аллергия) миллий касаллик деб аталади. Бу кўз ёшланиши, шунингдек қулоқ каналларидан сув оқиши, бурун оқиши, аксириш ва қичишишга олиб келади. Миллионлаб фуқаролар баҳорда аллергиядан азият чекади. Япон садр дарахти кучли аллергия қўзғатади ва унинг таъсири бир неча ой давом этиши мумкин.
Аввалроқ Япония ҳукумати мамлакат аҳолисини поллиноздан халос қилиш учун келгуси 30 йил ичида дарахт гулчанглари ажралиб чиқишини икки баравар камайтиришга ваъда берган эди. Қайд этилишича, ўн йил ичида ёш садр дарахтларининг 90 фоиздан ортиғи ўрнини камроқ гулчанг ҳосил қилувчи турларга алмаштириш режалаштирилган.
Изоҳ (0)