Янги хизмат кийими American Airlines авиакомпаниясининг бир неча минг стюард ва стюардессаларида аллергия хуружини келтириб чиқарди. Бу ҳақда «ТАСС» хабар бермоқда.
2016 йил кузида анъанавий кўк кийим ўрнига берилган Twin Hill компаниясининг янги жун костюмларини кийганидан сўнг ходимларнинг кўпчилигида дарров ёки вақт ўтиши билан кучли бош оғриқлари, йўтал, кўз толиқиши, нафас қисиши, тошма тошиши кузатилган.
Шундан сўнг American Airlines янги либослар туфайли саломатлиги ёмонлашганларни аниқлаш учун «Ишонч телефони» очишга мажбур бўлди. Авиакомпаниянинг 4,6 мингдан ортиқ ходими бошқа фирмаларнинг синтетик матолар ёки пахтадан тикилган кийимларини кийиш истагини билдирди.
Twin Hill вакиллари костюмни ишлаб чиқаришдан аввал барча зарур текширишлар ўтказилгани, улар кийим хавфсиз эканлигини кўрсатганини маълум қилди.
American Airlines раҳбари Дуг Паркер ҳам янги кийимлар ходимларнинг фақат бир қисмида аллергия хуружини келтириб чиқарганлиги, 75 минг ходимга маъқул келгани, шу боис уларни тўлиқ қайтариб олиш мушкул масала эканлигини билдирди.
Изоҳ (0)