Самарқанднинг Ургут туманида Cobalt юк машинасига урилиши оқибатида ҳайдовчи ва уч нафар йўловчи вафот этди. Бу ҳақда вилоят ИИБ матбуот хизмати хабар берди.
Маълум қилинишича, воқеа 8 июнь куни соат 19:30 ларда Ургут тумани “Омонқўтон” маҳалласи ҳудудидан ўтувчи М-39 автомобиль йўлининг 1121-километрида юз берган.
Cobalt ҳайдовчиси машинани Ургут—Қарши йўналиши бўйлаб бошқариб келиб, бошқарувини йўқотиб, йўлнинг қарама-қарши томонидан ҳаракатланиб келаётган “КамАЗ” юк автомашинаси билан тўқнашган.
Оқибатда Cobalt ҳайдовчиси ва 3 йўловчиси олган тан жароҳатлари оқибатида ҳодиса жойида вафот этган. Шунингдек, “КамАЗ” ҳайдовчиси Ургут туман тиббиёт бирлашмасига ётқизилган.
Мазкур ҳолат юзасидан 8 июнь куни туман ИИБ ҳузуридаги ТБ томонидан Жиноят кодексининг 266-моддаси 3-қисми “а” банди билан жиноят иши қўзғатилган.
Изоҳ (0)