Яқин орада АҚШнинг собиқ президенти Дональд Трамп бармоқ излари ва бошқа тадбирлар учун вақтинча ҳибсга олиниши мумкин, бироқ кейин уни тилхат билан қўйиб юборилиши эҳтимоли катта, деди Франклин Рузвельт номидаги АҚШни ўрганиш жамғармаси директори, тарих фанлари доктори Юрий Рогулев.
Аввалроқ Майами шаҳри расмийлари махфий ҳужжатларни сақлаш иши бўйича суд тингловларидан сўнг Трамп ҳибсга олинган тақдирда юзага келиши мумкин бўлган тартибсизликларга тайёргарлик кўрган эди.
“Қарорни Майами суди эмас, федерал суд қабул қилади (суд шунчаки географик жиҳатдан Майамида жойлашган). Бу давлатга қарши жиноят ва бу айбловлар учун жиноий жавобгарлик мавжуд. Яъни, бу фуқаролик даъвоси эмас ва бу ҳолатда жарима билан қутулиб бўлмайди. У ёки айбдор деб топилиши керак ёки бутунлай айбсиз. Агар айбдор бўлса, жазо жуда оғир”, — деди Рогулев.
Мутахассис суд айбдор деб топган тақдирда ҳам Трамп ҳатто қамоқдан туриб сайлов кампаниясини давом эттириши мумкинлигини таъкидлади.
Трампнинг ўзи ҳам ҳар қандай шароитда, ҳатто унга қарши илгари сурилган айбловлар бўйича судланадиган бўлса ҳам, президентлик сайловларида қатнашишни давом эттиришга ваъда берди.
Изоҳ (0)