Қозоғистон президенти Қосим-Жўмарт Тўқаев Бирлашган Миллатлар Ташкилоти (БМТ) ҳозирда ягона нуфузли “универсал глобал ташкилот” бўлиб қолаётганини айтди, аммо унинг фикрича, БМТ Хавфсизлик кенгашини ислоҳ қилиш зарур.
“Биз Хавфсизлик кенгашини кенг қамровли ислоҳ қилмасдан туриб, мавжуд муаммоларни ҳал эта олмаймиз”, — деди Тўқаев Остона халқаро форумининг ялпи мажлисида. У БМТ Хавфсизлик Кенгаши таркибини унда “ўрта даражадаги кучлар” вакилларининг овози эшитиладиган даражада ўзгартиришни таклиф қилди.
Унинг фикрича, айни дамда “БМТ ташкил топганидан бери илк бор жаҳон тартиби асосларига чиндан путур етмоқда”. Қосим-Жўмарт Тўқаев жаҳондаги геосиёсий вазият ҳақида гапирар экан, “блок мафкураси” қайтаётганини таъкидлади.
“Бизни ажратган собиқ 'блок' мафкураси 30 йилдан сўнг қайтиб келганига гувоҳ бўлмоқдамиз. Бўлиниш фақат геосиёсий хусусиятга эга эмас. Уларнинг иқтисодий таъсири ҳам бор. Иқтисодий сиёсатнинг ўзи очиқдан-очиқ қурол сифатида қўлланади. Бу мухолифатга санкциялар ва савдо урушлари, мақсадли қарз сиёсати, молиялаштириш манбаларига киришни чеклаш ёки улардан ажратиш ва инвестицияларни назорат қилиш киради. Бу омиллар биргаликда сўнгги ўн йилликлардаги глобал тинчлик ва фаровонлик асоси бўлган пойдеворга: эркин савдо, глобал инвестициялар, инновациялар ва адолатли рақобатга аста-секин путур етказади”, — деди Тўқаев.
Қозоғистон раҳбарининг сўзларига кўра, оқибатда ишончсизлик кучайиб бормоқда, бу эса таниқли халқаро форумлар, мавжуд асослар, хавфсизлик режимлари, ядро қуролини тарқатмаслик механизмлари фаолиятига салбий таъсир кўрсатади.
Изоҳ (0)