Самарқандда эркак бегона аёлнинг суратларини монтаж қилиб, ундан пул талаб қилди

Самарқанд шаҳрида эркак ижтимоий тармоқда бегона аёлнинг суратларини монтаж қилиб, ундан пул, телефон ва тилла занжир талаб қилди. 

Хабарга кўра, Самарқанд шаҳрида яшовчи 36 ёшли З.Н. ариза билан мурожаат қилган. У ўзининг “Одноклассники” ижтимоий тармоғида жойлаштирган суратларини номаълум шахс юклаб олиб, уятли расмлари борлигини айтиб, пул талаб қилаётганини маълум қилган. 

Олиб борилган тезкор суриштирув ишлари натижасида пулларни ўзлаштирган шахс муқаддам судланган, Самарқанд вилояти Самарқанд шаҳрида яшовчи, 35 ёшли Т.У. экани аниқланган. Т.У. “Одноклассники” ижтимоий тармоғида З.Н. жойлаштирган фотосуратларини юклаб олиб, уларга махсус дастурлардан фойдаланиб ишлов берган. 

Ушбу уятли фотосуратларни, ижтимоий тармоқларга тарқатиб юбормаслик эвазига 6500 АҚШ доллари, бир дона iPhone 13 Prо ва бир дона эркаклар тилла занжири талаб қилгани маълум бўлди. 

Мазкур ҳолат юзасидан Т.У.га нисбатан Жиноят кодексининг  168-модда 3-қисми билан жиноят иши қўзғатилиб, тергов харакатлари олиб борилмоқда.