ДХХнинг Тошкент шаҳар бўйича бошқармаси ходимлари томонидан Иқтисодий жиноятларга қарши курашиш департаменти билан ҳамкорликда ўтказилган тезкор тадбирда ёқутни 300 минг долларга сотмоқчи бўлганлар ушланди.
.jpg)
ЎзАнинг маълум қилишича, 1968 йилга туғилган аёл соф оғирлиги 838 грамм бўлган ёқут қимматбаҳо тошни 300 минг долларга сотишга келишиб, ушбу суммадан 80 минг долларни олган вақтида ашёвий далиллар билан ушланган.
Тезкор суриштирув ҳаракатлари давомида, у мазкур қимматбаҳо тошни 1960 йилда туғилган эркакдан олгани аниқланиб, кўрилган чора-тадбирлар натижасида у ҳам ушланган. Ҳар икки фуқаро ҳам муқаддам фирибгарлик билан боғлиқ жиноятлари учун судланган бўлса-да, ўз хатоларидан тўғри хулоса чиқармаган.
Мутахассисларнинг баҳолашича, ушбу қимматбаҳо тошнинг нархи 477 миллион 256 минг сўмни ташкил этади.
Бошқа ҳолатда эса ДХХнинг Навоий ва Самарқанд вилоятлари бўйича бошқармалари ходимлари томонидан Бош прокуратура ҳузуридаги департаментнинг ҳудудий бошқармаси билан ҳамкорликда Булунғур туманидаги “Юқори нуқта” ЙПХ масканида тезкор тадбир ўтказилди.
Унда Тошкент шаҳри томон ҳаракатланаётган, Хатирчи туманида яшовчи, 1983 йилда туғилган фуқаро бошқарувидаги Nexia тўхтатилиб, кўздан кечирилганда, унинг салонида умумий оғирлиги 1 кило 75 грамм бўлган 11 дона бўлакдаги олтин борлиги аниқланиб, процессуал тартибда расмийлаштирган.
Мутахассисларнинг баҳолашича, ушбу 999 пробали олтиннинг қиймати 795 миллион сўмни ташкил этади.
Ҳозирда ҳар икки ҳолат юзасидан мазкур шахсларга ва бошқаларга нисбатан Жиноят кодексининг 177-моддаси (валюта қимматликларини қонунга хилоф равишда олиш ёки ўтказиш) 4-қисми “а” банди билан жиноят ишлари қўзғатилиб, тергов ҳаракатлари олиб борилмоқда.
Изоҳ (0)