“Маъмурий ислоҳотлар доирасида маданий мерос соҳасида давлат бошқарувини самарали ташкил қилиш чора-тадбирлари тўғрисида”ги президент қарори қабул қилинди, деб хабар беради Norma.
Унга кўра, “Республика ижро этувчи ҳокимият органлари фаолиятини самарали йўлга қўйишга доир биринчи навбатдаги ташкилий чора-тадбирлар тўғрисида”ги президент фармонига мувофиқ қуйидагилар тасдиқланди:
- Маданий мерос агентлиги фаолиятининг асосий йўналишлари ва ташкилий тузилмаси;
- Маданий мерос агентлигининг хусусий секторга бериладиган функциялари рўйхати;
- Маданий мерос соҳасида ислоҳотларни чуқурлаштириш ва тизим фаолиятини трансформация қилиш бўйича “йўл харитаси”.
Маданий мерос объектлари реставрацияси дирекцияси ва Маданий мерос объектларини асраш ва туризм ҳудудларининг мастер-режалари бўйича лойиҳалаштириш институти Маданий мерос илмий-тадқиқот институти деб қайта номланган ҳолда агентлик тизимига ўтказилмоқда.
Шунингдек, 2017–2027 йилларда давлат музейлари фаолиятини такомиллаштириш ва моддий-техника базасини мустаҳкамлаш бўйича комплекс чора-тадбирлар дастури бажарилишини мувофиқлаштириш бўйича республика комиссияси ва Музейлар фаолиятини такомиллаштириш ва қўллаб-қувватлаш бўйича республика ишчи гуруҳининг ваколат ва функциялари ҳам агентликка ўтказилмоқда.
Қуйидагилар Маданий мерос агентлиги фаолиятининг асосий йўналишлари ҳисобланади:
- моддий маданий мерос ва музейлар соҳасида ягона давлат сиёсатини амалга ошириш, унда иштирок этувчи давлат органларининг ушбу йўналишдаги фаолиятини мувофиқлаштириш;
- моддий маданий мерос объектлари, маданий бойликлар, музей ашёлари ва коллекцияларини аниқлаш, уларнинг давлат ҳисобини юритиш ҳамда соҳада таъсирчан давлат назоратини амалга ошириш;
- моддий маданий мерос ва музейлар соҳасига замонавий ахборот технологияларини кенг жорий этиш, уларга оид маълумотларнинг барча учун очиқ бўлишини таъминлаш;
- маданий меросимизнинг жаҳон маданий маконига интеграциялашувига кўмаклашиш ва уларни кенг оммалаштириш;
- илғор хорижий тажрибалар асосида музейларни комплекс ривожлантириш ва бошқалар.
Ҳужжат қонун ҳужжатлари маълумотлари миллий базасида эълон қилинган ва 6 июндан кучга кирди.
Маданий мерос агентлиги
2021 йил апрелда Жисмоний тарбия ва спорт вазирлиги ҳамда Туризмни ривожлантириш давлат қўмитаси негизида Туризм ва спорт вазирлиги ташкил қилинганди. Ушбу вазирлик ҳузурида Маданий мерос агентлиги ҳамда унинг ҳудудий бошқармалари ташкил этилган. Ўша йилнинг июнида Ўзбекистон президентининг 19 июндаги қарори билан Маданий мерос агентлигининг асосий вазифалари белгиланган эди.
Президент фармонига мувофиқ, 2023 йил 1 январдан республика давлат бошқаруви органларининг ташкилий бўйсунуви ўзгарди. Хусусан, Туризм ва маданий мерос вазирлиги ҳузуридаги Маданий мерос агентлиги – Вазирлар Маҳкамаси ҳузуридаги Маданият ва санъатни ривожлантириш жамғармаси ҳузурига ўтказилди.
Изоҳ (0)