“Maʼmuriy islohotlar doirasida madaniy meros sohasida davlat boshqaruvini samarali tashkil qilish chora-tadbirlari to‘g‘risida”gi prezident qarori qabul qilindi, deb xabar beradi Norma.
Unga ko‘ra, “Respublika ijro etuvchi hokimiyat organlari faoliyatini samarali yo‘lga qo‘yishga doir birinchi navbatdagi tashkiliy chora-tadbirlar to‘g‘risida”gi prezident farmoniga muvofiq quyidagilar tasdiqlandi:
- Madaniy meros agentligi faoliyatining asosiy yo‘nalishlari va tashkiliy tuzilmasi;
- Madaniy meros agentligining xususiy sektorga beriladigan funksiyalari ro‘yxati;
- Madaniy meros sohasida islohotlarni chuqurlashtirish va tizim faoliyatini transformatsiya qilish bo‘yicha “yo‘l xaritasi”.
Madaniy meros obyektlari restavratsiyasi direksiyasi va Madaniy meros obyektlarini asrash va turizm hududlarining master-rejalari bo‘yicha loyihalashtirish instituti Madaniy meros ilmiy-tadqiqot instituti deb qayta nomlangan holda agentlik tizimiga o‘tkazilmoqda.
Shuningdek, 2017–2027-yillarda davlat muzeylari faoliyatini takomillashtirish va moddiy-texnika bazasini mustahkamlash bo‘yicha kompleks chora-tadbirlar dasturi bajarilishini muvofiqlashtirish bo‘yicha respublika komissiyasi va Muzeylar faoliyatini takomillashtirish va qo‘llab-quvvatlash bo‘yicha respublika ishchi guruhining vakolat va funksiyalari ham agentlikka o‘tkazilmoqda.
Quyidagilar Madaniy meros agentligi faoliyatining asosiy yo‘nalishlari hisoblanadi:
- moddiy madaniy meros va muzeylar sohasida yagona davlat siyosatini amalga oshirish, unda ishtirok etuvchi davlat organlarining ushbu yo‘nalishdagi faoliyatini muvofiqlashtirish;
- moddiy madaniy meros obyektlari, madaniy boyliklar, muzey ashyolari va kolleksiyalarini aniqlash, ularning davlat hisobini yuritish hamda sohada taʼsirchan davlat nazoratini amalga oshirish;
- moddiy madaniy meros va muzeylar sohasiga zamonaviy axborot texnologiyalarini keng joriy etish, ularga oid maʼlumotlarning barcha uchun ochiq bo‘lishini taʼminlash;
- madaniy merosimizning jahon madaniy makoniga integratsiyalashuviga ko‘maklashish va ularni keng ommalashtirish;
- ilg‘or xorijiy tajribalar asosida muzeylarni kompleks rivojlantirish va boshqalar.
Hujjat qonun hujjatlari maʼlumotlari milliy bazasida eʼlon qilingan va 6-iyundan kuchga kirdi.
Madaniy meros agentligi
2021-yil aprelda Jismoniy tarbiya va sport vazirligi hamda Turizmni rivojlantirish davlat qo‘mitasi negizida Turizm va sport vazirligi tashkil qilingandi. Ushbu vazirlik huzurida Madaniy meros agentligi hamda uning hududiy boshqarmalari tashkil etilgan. O‘sha yilning iyunida O‘zbekiston prezidentining 19-iyundagi qarori bilan Madaniy meros agentligining asosiy vazifalari belgilangan edi.
Prezident farmoniga muvofiq, 2023-yil 1-yanvardan respublika davlat boshqaruvi organlarining tashkiliy bo‘ysunuvi o‘zgardi. Xususan, Turizm va madaniy meros vazirligi huzuridagi Madaniy meros agentligi – Vazirlar Mahkamasi huzuridagi Madaniyat va san’atni rivojlantirish jamg‘armasi huzuriga o‘tkazildi.
Izoh (0)