Адлия вазирлиги томонидан йўл белгиларини ўрнатиш билан боғлиқ муносабатларни тартибга солишга қаратилган қонун лойиҳаси ишлаб чиқилди. Бу ҳақда Telegram'даги “Ҳуқуқий ахборот” канали хабар берди.
Мазкур қонун қабул қилингудек бўлса, тақиқловчи йўл белгилари ўрнатилишидан олдин жамоатчилик хабардор қилинади, йўл белгилари дислокацияси онлайн тарзда эълон қилиб борилади.
Лойиҳада қуйидаги тартиблар белгиланмоқда:
- тақиқловчи йўл белгиларини ўрнатиш тўғрисидаги қарор қабул қилинишидан камида 20 кун олдин жамоатчилик хабардор қилинади;
- йўл белгилари реестри шакллантирилади ҳамда реестрга киритилмаган тақиқловчи йўл белгилари ҳуқуқий оқибат келтириб чиқармайди;
- йўл белгиларининг дислокацияси онлайн тарзда эълон қилиб борилади.
Тақиқловчи йўл белгилари фақат Қорақалпоғистон Республикаси Вазирлар Кенгаши раиси, вилоят, туман (шаҳар) ҳокимининг қарори асосида ўрнатилади.
Йўл-транспорт ҳодисалари билан боғлиқ ҳолатлар
Ўзбекистонда 2023 йилнинг тўрт ойи давомида 2144 та йўл-транспорт ҳодисасида 499 нафар фуқаро вафот этган. Хусусан, 7 май куни Тошкентнинг Олмазор туманида йўловчи автобуси ва Cobalt иштирокида ЙТҲ юз бергани, ундан олдин Қашқадарёда икки машина тўқнашуви оқибатида икки киши ҳалок бўлгани, Тошкентда бошқарувни йўқотган Cobalt ағдарилиб, ёниб кетгани, Хоразмда юқори тезликда ҳаракатланиб, дарахтга урилган Spark йўловчиси ҳалок бўлгани тўғрисида хабар берилганди.
Изоҳ (0)