Adliya vazirligi tomonidan yo‘l belgilarini o‘rnatish bilan bog‘liq munosabatlarni tartibga solishga qaratilgan qonun loyihasi ishlab chiqildi. Bu haqda Telegram’dagi “Huquqiy axborot” kanali xabar berdi.
Mazkur qonun qabul qilingudek bo‘lsa, taqiqlovchi yo‘l belgilari o‘rnatilishidan oldin jamoatchilik xabardor qilinadi, yo‘l belgilari dislokatsiyasi onlayn tarzda eʼlon qilib boriladi.
Loyihada quyidagi tartiblar belgilanmoqda:
- taqiqlovchi yo‘l belgilarini o‘rnatish to‘g‘risidagi qaror qabul qilinishidan kamida 20 kun oldin jamoatchilik xabardor qilinadi;
- yo‘l belgilari reyestri shakllantiriladi hamda reyestrga kiritilmagan taqiqlovchi yo‘l belgilari huquqiy oqibat keltirib chiqarmaydi;
- yo‘l belgilarining dislokatsiyasi onlayn tarzda eʼlon qilib boriladi.
Taqiqlovchi yo‘l belgilari faqat Qoraqalpog‘iston Respublikasi Vazirlar Kengashi raisi, viloyat, tuman (shahar) hokimining qarori asosida o‘rnatiladi.
Yo‘l-transport hodisalari bilan bog‘liq holatlar
O‘zbekistonda 2023-yilning to‘rt oyi davomida 2144 ta yo‘l-transport hodisasida 499 nafar fuqaro vafot etgan. Xususan, 7-may kuni Toshkentning Olmazor tumanida yo‘lovchi avtobusi va Cobalt ishtirokida YTH yuz bergani, undan oldin Qashqadaryoda ikki mashina to‘qnashuvi oqibatida ikki kishi halok bo‘lgani, Toshkentda boshqaruvni yo‘qotgan Cobalt ag‘darilib, yonib ketgani, Xorazmda yuqori tezlikda harakatlanib, daraxtga urilgan Spark yo‘lovchisi halok bo‘lgani to‘g‘risida xabar berilgandi.