БААдаги “Аёллар ва болаларга ёрдам кўрсатиш маркази” хайрия ташкилоти ҳамда Uzbekistan Airways ҳамкорлигида 3 нафар қаровсиз қолган вояга етмаган Ўзбекистон фуқаролари ватанга қайтарилди. Бу ҳақда “Дунё” агентлиги хабар берди.

Маълумотларга кўра, 2022 йилнинг апрель ойидан буён Дубай полиция қўмондонлиги ҳузуридаги ҳибисхонада сақланилаётган Ўзбекистон фуқороси Д.С.нинг қаровсиз қолган 3 нафар вояга етмаган фарзанди Бош консулхона иштирокида уй-жой, озиқ-овқат ва бошқа керакли нарсалар билан таъминлаб келинган.

Ваколатхона томонидан БАА Ташқи ишлар вазирлиги ва маҳаллий полиция вакиллари билан олиб борилган музокаралар натижасида Д.С. ҳамда унинг фарзандлари ўртасида оналикни белгилаш бўйича ДНК текширувлари қайд қилиниб, натижада Ўзбекистон фуқароси учала боланинг биологик онаси экани аниқланган.

Шу аснода унинг фарзандларига маҳаллий идоралар томонидан туғилганлик ҳақида гувоҳномалар расмийлаштирилиб, ватанга қайтиш гувоҳномаси асосида улар 2 июнь куни Дубай—Тошкент авиақатнови билан Ўзбекистонга кузатиб қўйилди.

2022 йилнинг октябрида Россиянинг Хакасия Республикаси Абакан шаҳрига ишлаш мақсадида бориб, меҳнатга лаёқатсиз бўлиб қолган фуқаро Ўзбекистонга қайтарилганди. Шу йилнинг февраль охирларида бўлса, Ростов вилояти хорижий фуқароларни вақтинча сақлаш марказларидаги 47 нафар Ўзбекистон фуқароси ватанга қайтарилгани тўғрисида хабар берилганди.