BAAdagi “Ayollar va bolalarga yordam ko‘rsatish markazi” xayriya tashkiloti hamda Uzbekistan Airways hamkorligida 3 nafar qarovsiz qolgan voyaga yetmagan O‘zbekiston fuqarolari vatanga qaytarildi. Bu haqda “Dunyo” agentligi xabar berdi.
Ma’lumotlarga ko‘ra, 2022-yilning aprel oyidan buyon Dubay politsiya qo‘mondonligi huzuridagi hibisxonada saqlanilayotgan O‘zbekiston fuqorosi D.S.ning qarovsiz qolgan 3 nafar voyaga yetmagan farzandi Bosh konsulxona ishtirokida uy-joy, oziq-ovqat va boshqa kerakli narsalar bilan taʼminlab kelingan.
Vakolatxona tomonidan BAA Tashqi ishlar vazirligi va mahalliy politsiya vakillari bilan olib borilgan muzokaralar natijasida D.S. hamda uning farzandlari o‘rtasida onalikni belgilash bo‘yicha DNK tekshiruvlari qayd qilinib, natijada O‘zbekiston fuqarosi uchala bolaning biologik onasi ekani aniqlangan.
Shu asnoda uning farzandlariga mahalliy idoralar tomonidan tug‘ilganlik haqida guvohnomalar rasmiylashtirilib, vatanga qaytish guvohnomasi asosida ular 2-iyun kuni Dubay—Toshkent aviaqatnovi bilan O‘zbekistonga kuzatib qo‘yildi.
2022-yilning oktabrida Rossiyaning Xakasiya Respublikasi Abakan shahriga ishlash maqsadida borib, mehnatga layoqatsiz bo‘lib qolgan fuqaro O‘zbekistonga qaytarilgandi. Shu yilning fevral oxirlarida bo‘lsa, Rostov viloyati xorijiy fuqarolarni vaqtincha saqlash markazlaridagi 47 nafar O‘zbekiston fuqarosi vatanga qaytarilgani to‘g‘risida xabar berilgandi.
Izoh (0)