Бухоро шаҳрида ижарадаги уйида фоҳишахона ташкил қилган 32 ёшли аёл ушланди. Бу ҳақда Бухоро вилояти ИИБ ахборот хизмати хабар берди. 

Қайд этилишича, шаҳарнинг “Гулчорбоғ” маҳалласида яшовчи, 1991 йилда туғилган Й.С. икки нафар мижозга енгил табиатли Х.Г. исмли аёлни топиб бериб, уларнинг жинсий алоқа қилишлари учун ўзи ижарада яшаётган хонадонидан жой ажратиб берган. Аёл бунинг учун улардан 300 минг сўм пул олган.

Мазкур ҳолат юзасидан шаҳар ИИО ФМБ томонидан Жиноят кодексининг 131-моддаси (қўшмачилик қилиш ёки фоҳишахона сақлаш) 2-қисми билан жиноят иши қўзғатилиб, дастлабки тергов ҳаракатлари олиб борилмоқда.

Бу каби ҳолатлар Бухоро вилоятида бир неча бор аниқланган. Хусусан, Бухоро туманида хонадонида 100 минг сўмга фоҳишахона ташкил қилган 64 ёшли эркак ушланганди. Бухоро шаҳри Алпомиш кўчасида яшовчи, 1980 йилда туғилган эркак ҳам яшаш хонадонида фуқароларнинг жинсий алоқа қилиши учун 60 000 сўм эвазига етарли шарт-шароит яратиб бериб, фоҳишахона ташкил қилгани аниқлангани тўғрисида хабар берилган эди. Бир неча кун олдин эса Бухоро шаҳрида фоҳишахона ташкил қилиш билан боғлиқ бир нечта жиноий ҳолатларга чек қўйилганди.