Шавкат Мирзиёев Ҳиндистонда рўй берган темирйўл ҳалокати оқибатида кўплаб инсонлар ҳалок бўлгани ва жароҳатлангани муносабати билан Ҳиндистон президенти Драупади Мурму ва бош вазири Нарендра Модига таъзия йўллади. Бу ҳақда президент матбуот котиби хабар берди.

Давлат раҳбари вафот этганларнинг оила аъзолари ва яқинларига чуқур ҳамдардлик билдириб, жароҳат олганлар тез фурсатда соғайиб кетишини тилаган.

Одиша шаҳрида 2 июнь куни маҳаллий вақт билан 19:20 атрофида (Тошкент вақти билан 18:50) Coromandel Express йўловчи поезди ва юк поезди тўқнашган. Оқибатда саккизта вагон релсдан чиқиб кетган. Hindustan Times газетасининг ёзишича, вагонлар қўшни йўлга ағдарилган, у ерда вагонларга бошқа йўловчи поезди келиб урилган. Ҳозирда поездлар тўқнашуви қурбонлари сони 288 кишига етган. Бу Ҳиндистонда сўнгги 20 йилда рўй берган энг йирик авариядир. Мамлакатда мотам эълон қилинган.

Ҳиндистон бош вазири Нарендра Моди воқеа муносабати билан ҳамдардлик билдирди ва қурбонларнинг оилаларига 2 миллион рупий (24,3 минг доллар), ярадорларга эса 50 минг рупий (600 доллардан сал кўпроқ) тўланишини айтган.