Фарғона вилояти ИИБ Тезкор-қидирув хизмати томонидан ер ресурсларини талон-торож қилиш билан боғлиқ ҳолат аниқланди, деб хабар беради ИИВ ахборот хизмати.
Маълум қилинишича, 1997 йилда Фарғона вилоятида туғилган фуқаро вилоят ИИБ бошлиғи номига ёзган аризасига кўра, Жиноят-қидирув бошқармаси, Коррупция ва иқтисодий жиноятларга курашиш бўлими ходимлари томонидан тезкор тадбир ўтказилган.
Қирғизистонда туғилган 38 ёшли Россия фуқароси Қувасой шаҳар “Қўчқорча” қишлоғи ҳудудида жойлашган боғдорчилик фермер хўжалигига узоқ муддатга ижарага берилган 14 гектар ер майдонини ҳеч қандай ҳужжатларсиз 140 минг долларга сотишга келишган.
Гумонланувчи олдиндан бўнак сифатида талаб қилинган 15 минг доллар миқдоридаги пулларни олган вақтда ашёвий далиллар билан ушланган.
Ҳозирда мазкур ҳолат юзасидан терговга қадар текширув ҳаракатлари олиб борилмоқда.
Ноқонуний ер савдолари
Апрель бошларида Навоийда 80 гектар ерни 1 миллиард сўмга сотишга уринган шахслар қўлга олингани, Самарқанд ва Фарғонада ноқонуний ер сотиш ҳолатларига чек қўйилгани тўғрисида хабар берилганди. Шунингдек, Қорақалпоғистон Республикаси ва Бухоро вилоятида ер майдонлари савдоси билан боғлиқ фирибгарлик ҳолатлари фош этилган эди. Май охирларида Ўзбекистоннинг уч ҳудудида ноқонуний ер сотаётганлар қўлга олинганди.
Изоҳ (0)