Ўзбекистон ташқи ишлар вазири Бахтиёр Саидов расмий ташриф билан Ўзбекистонда бўлиб турган Жанубий Корея ташқи ишлар вазири Пак Чин билан учрашув ўтказди. Бу ҳақда вазир ўзининг Telegram’даги канали орқали маълум қилди.
Қайд этилишича, Ташқи ишлар вазирликлари ўртасидаги ҳамкорликни жадаллаштириш, фаол ишбилармонлик алоқалари учун замин яратиш, “Жанубий Корея + Марказий Осиё” мулоқотини бойитиш, тинчлик ва хавфсизлик, билим ва технологиялар алмашинуви каби масалалар кун тартибидан жой олган.
Шу билан бирга, Бахтиёр Саидов Жанубий Корея Ўзбекистоннинг асосий стратегик ҳамкорларидан бири бўлиб келгани ва шундай бўлиб қолишини қайд этган.
“Жанубий Корея ташқи ишлар вазири Пак Чин билан ҳукуматларимиз ўртасида иқлим ўзгариши бўйича ҳамкорлик тўғрисида ҳадли битимни имзоладик”, — деб ёзади у.
Шунингдек, Жанубий Корея делегациясининг Ўзбекистонга ташрифи доирасида парламент, қишлоқ хўжалиги, фитосанитария, ўрмончилик ва ақлли технологиялар соҳасида алоқаларни ривожлантиришга қаратилган қатор ҳужжатлар ҳам имзоланган.
1 июнь куни расмий ташриф билан мамлакатда бўлиб турган Корея ташқи ишлар вазири Пак Чин бошчилигидаги делегацияни президент Шавкат Мирзиёев ҳам қабул қилганди. Томонлар дўстлик ва алоҳида стратегик шериклик муносабатларини янада мустаҳкамлаш, ҳамкорликни, энг аввало, савдо-иқтисодий, инвестициявий ва молиявий-техник соҳаларда кенгайтиришнинг долзарб масалаларини муҳокама қилган.
Изоҳ (0)