O‘zbekistonning uch hududida yer maydonlarini sotish bilan bog‘liq firibgarlik holatlari fosh etildi. Bu haqda Iqtisodiy jinoyatlarga qarshi kurashish departamenti axborot xizmati xabar berdi.
Unga ko‘ra, Bosh prokuratura huzuridagi departamentning Nurobod tuman bo‘limi tomonidan DXX xodimlari bilan hamkorlikda o‘tkazilgan tezkor tadbirda “Ch.M.” fermer xo‘jaligi rahbari Sh.R. xo‘jalikning 1,5 gektar yer maydonini fuqaro D.S.ga 120 000 AQSH dollariga sotishga kelishib, shundan 60 000 AQSH dollarini olgan vaqtida ashyoviy dalillar bilan ushlangan.
Shu kabi holat departamentning Mirzo Ulug‘bek tuman bo‘limi tomonidan DXX xodimlari bilan hamkorlikda o‘tkazilgan tezkor tadbirda ham aniqlangan. Fuqaro X.T. (muqaddam sudlangan) va boshqalar o‘zaro til biriktirib, Qashqadaryo viloyati, Ko‘kdala tumani hududidan dehqon xo‘jaligi yuritish uchun ajratilgan 1 gektar yer maydonini fuqaro M.Ya.ga yuqori lavozimda ishlovchi tanishlari yordamida uning nomiga rasmiylashtirib berishi evaziga 20 000 AQSH dollarini olgan vaqtida ashyoviy dalillar bilan ushlangan.
Bundan tashqari, departamentning To‘rtko‘l tuman bo‘limi tomonidan DXX xodimlari bilan hamkorlikda o‘tkazilgan tezkor tadbirda fuqarolar R.X. va L.R. Ellikqalʼa tumani, “Istiqlol” MFY hududidagi 12 sotix yer maydonini fuqaro M.S.ga 14 000 AQSH dollariga sotishga kelishib, 6000 AQSH dollari va 92 million so‘mni olgan vaqtida ushlangan.
Mazkur holatlar yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishlari qo‘zg‘atilib, tergov harakatlari o‘tkazilmoqda.
Izoh (0)