“Реал Мадрид” ярим ҳимоячиси Лука Модрич жорий мавсум якунида испан клубини тарк этиши мумкин.
ОК Diario нашрининг хабар қилишича, 37 ёшли футболчи Саудия Арабистонидан таклиф олган. “Олтин тўп” соҳибига араблар уч йиллик шартнома учун 120 миллион евро тўлашга тайёр.
Қайд этилишича, Модрич клуб раҳбариятига кетиш истагида эканини маълум қилган. Ўз навбатида Испаниядаги бошқа бир нечта манба Модричнинг кетмаслиги ҳақида ёзган.
Модричнинг “Реал” билан амалдаги шартномаси 2023 йилнинг июнь ойида тугайди. Аввалроқ италиялик инсайдер Фабрицио Романо томонлар шартномани узайтириш борасида келишувга эришгани, бироқ клуб сўнгги қарорни футболчининг ўзига қолдиришини айтганди.
Лука “Реал”да 2012 йилдан бери ҳаракат қилиб келади. Мадрид жамоаси сафида у 22 та совринга эга чиқди, улар орасида 5 та Чемпионлар Лигаси ва 3 та Ла Лига бош соврини бор. 2018 йилда хорватиялик ярим ҳимоячи “Олтин тўп”га сазовор бўлганди.
“Реал” ёзда марказий ярим ҳимоя чизиғини “Боруссия Д” вакили Жуд Беллингҳем билан тўлдиради.
Аввалроқ “Реал” тўпурари Карим Бензема Саудия Арабистонидан таклиф олгани хабар қилинганди.
Изоҳ (0)