Европа Иттифоқи Арманистон бош вазири Никол Пашинян ва Озарбайжон президенти Илҳом Алиев ўртасида “катта учрашув”га тайёрланмоқда. Музокараларда Франция президенти Эммануэл Макрон, Германия канцлери Олаф Шольц ва Европа кенгаши раҳбари Шарл Мишел ҳам иштирок этади. Учрашув 31 май куни Кишинёвдаги Европа сиёсий саммити доирасида бўлиб ўтади.
“Тасдиқлашим мумкинки, Арманистон ва Озарбайжон раҳбарлари билан учрашув бўлади. Эртага президент Макрон ва канцлер Шольц билан катта учрашув бўлиб ўтади. Бу биз учун катта иш бўлиб, бунга астойдил тайёргарлик кўрмоқдамиз”, — деди Брюсселда журналистларга Европа Иттифоқининг юқори мартабали вакили.
25 май куни Арманистон ва Озарбайжон ҳудудий можаронинг ҳал этилишини эълон қилди. Озарбайжон томони Арманистон билан тинчлик шартномаси 1 июнь куни Кишинёвда имзоланиши мумкинлигини илгари сурди. Никол Пашинян ҳозирда ҳужжатнинг тўртинчи нашри муҳокама қилинаётганини, бироқ келишувнинг якуний варианти йўқлигини таъкидлади.
Изоҳ (0)