Бухоро шаҳрида фоҳишахона ташкил қилиш билан боғлиқ бир нечта жиноий ҳолатларга чек қўйилди. Бу ҳақда вилоят Ички ишлар бошқармаси ахборот хизмати хабар берди.
Қайд этилишича, Бухоро шаҳри “Пиридастгир” маҳалласида яшовчи, 1967 йилда туғилган М.З. исмли аёл ўзи ишлаб келаётган уй меҳмонхонасида фуқаролар Қ.Ў. ва Қ.И.нинг жинсий алоқада бўлиши учун алоҳида хона ажратиб, шарт-шароит яратиб бериб, бунинг эвазига 200 минг сўм миқдоридаги пулларни олиб, ғаразли ва бошқа паст ниятларда фоҳишахона ташкил қилган.
Иккинчи ҳолатда эса Бухоро тумани “Қ.Маҳмуд” маҳалласида рўйхатда турувчи, 1992 йилда туғилган Ш.З. исмли аёл ўзи истиқомат қиладиган Бухоро шаҳар Турди Фароғий кўчасида жойлашган кўп қаватли уйлардан биридаги хонадонида ғаразли ва паст ниятларда, моддий манфаатдор бўлиш мақсадида Й.Р.нинг П.А. билан жинсий алоқа қилиши учун алоҳида хона ажратиб бериб, бунинг эвазига 100 минг сўм олиб, фоҳишахона ташкил этган.
Навбатдаги худди шундай ҳолатда Навоий вилояти Қизилтепа туманида рўйхатда туриб, Бухоро шаҳри Турди Фароғий кўчасида жойлашган кўп қаватли уйлардан биридаги хонадонда вақтинчалик яшаб келаётган, 1980 йилда туғилган О.Д. исмли аёл фуқаролар Р.Д. ва Қ.Ф.нинг жинсий алоқада бўлишлари учун алоҳида хона ажратиб, шарт-шароит яратиб бериб, бунинг эвазига 200 минг сўм миқдоридаги нақд пулни олиб, фоҳишахона ташкил қилган.
Шунингдек, Шофиркон тумани “Қуйи Чуқурак” маҳалласида рўйхатда туриб, Бухоро шаҳри Ислом Каримов кўчасида жойлашган кўп қаватли уйлардан биридаги хонадонда ижарада яшаб келаётган, 1997 йилда туғилган Ҳ.Д. исмли аёл ғаразли ва паст ниятларда, моддий манфаатдор бўлиш мақсадида С.М. ва Р.М.ни қўшмачилик йўли билан топиб бериб, уларнинг жинсий алоқа қилишлари учун жой ажратиб бериб, 400 минг сўм олиб, фоҳишахона ташкил қилгани аниқланган.
Юқоридаги ҳолатлар юзасидан Жиноят кодексининг 131-моддаси тегишли бандлари билан жиноят иши қўзғатилиб, дастлабки тергов ҳаракатлари олиб борилмоқда. Бу каби жиноий ҳолатларнинг олдини олиш ва содир этилиши мумкин бўлган жиноятларни фош этиш борасидаги тезкор ҳамда профилактик тадбирлар давом эттирилмоқда.
Изоҳ (0)