Ўзбекистоннинг уч ҳудудида ер майдонларини сотиш билан боғлиқ фирибгарлик ҳолатлари фош этилди. Бу ҳақда Иқтисодий жиноятларга қарши курашиш департаменти ахборот хизмати хабар берди.
Унга кўра, Бош прокуратура ҳузуридаги департаментнинг Нуробод туман бўлими томонидан ДХХ ходимлари билан ҳамкорликда ўтказилган тезкор тадбирда “Ч.М.” фермер хўжалиги раҳбари Ш.Р. хўжаликнинг 1,5 гектар ер майдонини фуқаро Д.С.га 120 000 АҚШ долларига сотишга келишиб, шундан 60 000 АҚШ долларини олган вақтида ашёвий далиллар билан ушланган.
Шу каби ҳолат департаментнинг Мирзо Улуғбек туман бўлими томонидан ДХХ ходимлари билан ҳамкорликда ўтказилган тезкор тадбирда ҳам аниқланган. Фуқаро Х.Т. (муқаддам судланган) ва бошқалар ўзаро тил бириктириб, Қашқадарё вилояти, Кўкдала тумани ҳудудидан деҳқон хўжалиги юритиш учун ажратилган 1 гектар ер майдонини фуқаро М.Я.га юқори лавозимда ишловчи танишлари ёрдамида унинг номига расмийлаштириб бериши эвазига 20 000 АҚШ долларини олган вақтида ашёвий далиллар билан ушланган.
Бундан ташқари, департаментнинг Тўрткўл туман бўлими томонидан ДХХ ходимлари билан ҳамкорликда ўтказилган тезкор тадбирда фуқаролар Р.Х. ва Л.Р. Элликқалъа тумани, “Истиқлол” МФЙ ҳудудидаги 12 сотих ер майдонини фуқаро М.С.га 14 000 АҚШ долларига сотишга келишиб, 6000 АҚШ доллари ва 92 миллион сўмни олган вақтида ушланган.
Мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.
Изоҳ (0)