Тошкент шаҳрининг Яшнобод туманида яшовчи 54 ёшли эркакка ўзи яшайдиган уйнинг кириш йўлагида қўшнисининг 11 ёшли қизига нисбатан уятсиз, бузуқ ҳаракатлар қилгани учун қамоққа олиш эҳтиёт чораси қўлланилди. Бу ҳақда “Дарё” мухбири хабар бермоқда.

Маълум қилинишича, 1969 йилда туғилган, У.А. “Оилага, ёшларга ва ахлоққа қарши жиноятлар” туркумига кирувчи — ўн олти ёшга тўлмаган шахсга нисбатан уятсиз, бузуқ ҳаракатлар қилиш жиноятини содир этганликда гумон қилинган. Яъни, у ўзи истиқомат қилиб келаётган уйнинг кириш йўлагида вояга етмаган 2012 йилда туғилган А.нинг қаровсиз юрганлигини кўриб, унинг иккала елка қисмидан қўллари билан ушлаб, юз ва лабларидан ўпиб, орқа қисмидан ушлаб, унга нисбатан уятсиз-бузуқ ҳаракатлар қилган.

Олиб борилган тергов жараёнида У.А. Жиноят процессуал кодексининг 227-моддаси тартибида ушланиб, унга нисбатан 129-моддаси 2-қисми (ўн олти ёшга тўлмаган шахсга нисбатан уятсиз-бузуқ ҳаракатлар қилиш) билан жиноят иши қўзғатилган. Ҳозирда тергов олиб борилмоқда.

У.А.нинг дастлабки терговдан яшириниши мумкинлигини инобатга олиб, унга нисбатан қамоққа олиш тарзидаги эҳтиёт чораси қўлланилган.

Эслатиб ўтамиз, ушбу модда билан айбдор деб топилган шахс уч йилдан беш йилгача озодликни чеклаш ёхуд уч йилдан беш йилгача озодликдан маҳрум қилиш билан жазоланади.