Наманганда “Фарғона водийсида туризм: янги Ахсикент туризм марказини яратиш” мавзусидаги халқаро илмий-амалий конференция бўлиб ўтди. Бу ҳақда “Дарё” мухбири Азизбек Абдувалиев хабар бермоқда.

Анжуманда иштирок этган Наманган вилояти ҳокими Шавкат Абдураззоқов ушбу анжуман 62-халқаро гуллар фестивали доирасида ўтказилаётгани бежиз эмаслигини таъкидлади.

“Туризмни вилоят иқтисодиётининг асосий драйверларидан бири сифатида кўрмоқдамиз. Бобурга бешик бўлган Ахсикент эса бу борада алоҳида ўрин тутади. Айни пайтда бу ерда туризм кластерини ташкил этиш концепцияси ишлаб чиқилмоқда. Ушбу режага асосан Ахсикент ҳудудида Марказий Осиёдаги энг катта музейлардан бири ташкил этилади. Ахсикентнинг қадимий довруғини тиклаш мақсадида рамзий дарвоза қурилади, Умаршайх Мирзо ва Бобур ҳайкаллари тикланади. Сайёҳлар учун Сирдарё бўйлаб қайиқларда сайр қилиш, от ва туяларда кўҳна шаҳарни томоша қилиш имконияти яратилади”, — деди Наманган вилояти ҳокими.

Шавкат Абдураззоқовга кўра, туризм шаҳарчаси келгусида меҳмонхона, карвонсарой, ресторан ва миллий ҳунармандчилик расталарини ўз ичига олади.

Анжуманда сўз олганлар туризм ривожида Ахсикент каби археологик ёдгорликларнинг ўрни ва аҳамияти ҳақида маъруза қилди. Анжуман якунида, шунингдек, меҳмонлар Ахсикент очиқ осмон остидаги музейи ва “Ахси саййидлари” илмий-маърифий мажмуаси билан танишди.