Россияда ўзбек гилосида шарқ мевахўри ҳашароти аниқланди — Ўзбекистон ўсимликлар карантини ва ҳимояси агентлиги

Аввалроқ Россияда ўзбек гилосидан вирус топилгани, бу Ўсимликлар карантини ва ҳимояси агентлиги томонидан ўрганилаётгани ҳақида хабар берилган эди. Ҳолат юзасидан агентлик директорининг матбуот котиби Сабина Садинова “Дарё”га қўшимча маълумот берди.

“Вазиятга ойдинлик киритиш мақсадида Россельхознадзор федерал хизмати билан музокаралар олиб борилди. Россия томони маълум қилишича, Омск вилоятига етиб борган гилос партиясида шарқ мевахўри ҳашароти аниқланган. Икки томоннинг келишувига асосан маҳсулотдан намуналар олиниб фитосанитария лаборатория текшируви ўтказилиши, экспертиза хулосасида шарқ мевахўри личинкалари тирик ҳолда аниқланган тақдирда фумигация (зарарсизлантириш) ишлари олиб борилганидан сўнг Федерация ҳудудига олиб кирилиши белгиланди”, — деди Сабина Садинова.

Унинг қўшимча қилишича, бу зараркунанда Россия учун хам карантин ҳисобланмайди, такроран лаборатория экспертизаси ўтказилади, юкда ҳашаротни тириги топилса фумигация (зарарсизлантириш) ишлари олиб борилиб, Россия ҳудудига киритилади.

Маълумот учун, мазкур ҳашарот ўсимликнинг ўзи учун хавфли, ҳосилдорлигига таъсир қилади. Лекин инсон организми учун ҳеч қандай зарари йўқ.