Хитойнинг Шанси провинцияси Яньлин шаҳрида ШҲТга аъзо, кузатувчи ва ҳамкор мамлакат вакилларининг камбағалликни қисқартириш, фаровон ҳаёт билан таъминлаш масалаларига бағишланган форуми иш бошлади, деб хабар беради ЎзА.
Маълум қилинишича, форум иштирокчилари дастлаб Хитой тажрибаси маҳсули — камбағалликдан чиқарилган аҳоли турмуш тарзи, меҳнат фаолиятини акс эттирувчи кўргазма билан танишган. Сўнгра форумнинг очилиши ҳамда ялпи йиғилиши бўлиб ўтган. Унда нафақат ШҲТ майдонидаги, балки Осиё, Африкадаги Хитой тажрибасига қизиққан давлатлар вакиллари иштирок этган.
Форум ишида Ўзбекистон бош вазирининг ўринбосари Жамшид Қўчқоров бошчилигидаги делегация ҳам қатнашмоқда.
Ялпи йиғилишда сўзга чиққан Жамшид Қўчқоров форум аҳамиятини таъкидлаб ўтди. У ўз чиқишида мамлакатда бир-бири билан узвий боғлиқ ислоҳотлар натижасида 2022 йилнинг ўзида 1 миллион одам камбағалликдан чиқарилганини айтди. Жамшид Қўчқоров ялпи мажлисда Ўзбекистон томонининг амалий таклифларини ҳам айтиб ўтган.
“Камбағалликни қисқартириш тажрибаси Хитойда орттирилган ва бугун барча мамлакатларга таклиф этилаётган бўлса-да, ҳар бир давлат уни бойитиб боряпти. Масалан, Ўзбекистонда қишлоқ аҳолиси турмуш шароитини яхшилаш, инфратузилма яратиш, таълим, соғлиқни сақлаш соҳаларини ривожлантириш, кичик бизнес юритиш имкониятларини кенгайтиришга алоҳида эътибор берилмоқда. Ҳатто ҳар бир маҳаллада ҳоким ёрдамчиси институти ташкил этилди. Шунинг учун ҳам ШҲТ қошида камбағалликни қисқартириш тажрибасини таҳлил ва тарғиб қилувчи доимий фаолият кўрсатадиган қўмита тузишни таклиф этаман”, — дейди Жамшид Қўчқоров.
Май ўрталарида Ўзбекистонда 2023 йил биринчи чорагида 210 минг аҳоли камбағалликдан чиқарилгани тўғрисида хабар берилганди.
Изоҳ (0)