Кинода либосларнинг аҳамияти катта. Улар актёрларга ролга яхшироқ мослашиш ва қаҳрамонни ҳис қилишларига ёрдам беради. Аммо фильм қаҳрамони экранда қанчалик ажойиб кўринишга эга бўлса, актёр суратга олиш ишларида шунчалик қийналган бўлади.
Рене Зеллвегер — “Пем ҳақида нимадир”
Жиноятчи Пем Хап образини яратиш учун Рене Зеллвегер ҳар куни 4,5 соатгача вақтини гримёр креслосида ўтказди. Актриса катта костюм ва силикон протез кийган эди. Рененинг елимга аллергияси борлиги сабаб суратга олиш пайтида у кўп миқдорда антигистаминлар ичишга мажбур бўлади.
Реге Пейж — “Енгилмас жамоа ва аждар”
Реге фильмда жуда ноқулай костюм кийганидан шикоят қилади. Унинг сўзларига кўра, зирҳли совутда ҳаракат қилишнинг ўзи бўлмаган. “Кун бўйи иссиқ кийимда терлаб ўтирасан. Тер ҳеч қаерга чиқиб кетмайди, ичкарида қолиб кетади. Сув остига шўнғиш костюмини кийганга ўхшайсан, фарқи ўзингдан чиқаётган терга ғарқ бўлиб ўтирасан!”, — деб ўртоқлашади “Брижертонлар” юлдузи.
Марго Робби — “Уолл-стрит бўриси”
Актрисанинг сочи ва макияжига тахминан икки соат кетган. Аммо кийимларни кийиш ундан ҳам кўп вақтни олади. Марго қаҳрамони кийган барча кийим ва аксессуарлар винтаж эди. Улар ичида илон терисидан тикилган Prada этиклари ҳам бор эди — Роббига камида икки ўлчам кичикроқ. Аммо актриса ҳам, суратга олиш гуруҳи ҳам улардан фойдаланишга аҳд қилади. “Этикларни деярли икки ой давомида кенгайтиришга ҳаракат қилдик. Ўша кун келганда оёқларимни мойлашди, кейин болалар кукуни сепишди ва 20 дақиқа давомида қуритишга ҳаракат қилишди. Мен қонни тушириш учун оёқларимни баланд кўтариб ўтирдим. Шунча ҳаракатларга қарамай этиклар кадрда кўринмаган. Буни кўриб йиғлаб юборай дедим”, — деб эслайди актриса.
Бред Питт — “Вампир билан интервью”
Визуал эффектлар устаси сифатида танилган Стенли Уинстон актёрларнинг ташқи кўриниши учун масъул эди. Шунингдек, у грим учун махсус техникани ихтиро қилди. Шаффоф тери кўринишига эришиш учун ҳар куни гримдан олдин актёрни 30 дақиқа давомида оёғини осмондан қилиб қўйишган. Бу вақт ичида қон бошга тушади, томирлар шишиб, аниқ кўриниб қолади. Визажистлар фақат контурларни чизиб олишлари керак эди. Баъзан процедура бир неча марта такрорланган.
Аммо актёрнинг азоби бу билан чекланмайди. У ноқулай сунъий тиш ва контакт линза тақишига тўғри келади. Бундан ташқари, суратга олиш асосан тунда олиб борилган ва суратга олиш гуруҳи деярли қуёшни кўрмаган. Жараён Бред Питтни шунчалик чарчатадики, лойиҳани тарк этмоқчи бўлади. Агар актёр шартнома бўйича тўлаши керак бўлган 40 миллион доллар жарима бўлмаганида, уни Луизиан Креол Луи ролида кўрмаган бўлардик.
Хавер Бардем — “Қувғин”
Ака-ука Коэнлар фильми Бардемга “Энг яхши иккинчи пландаги актёр” номинациясида “Оскар” олиб келди. Эътиборлиси, актёр дастлаб фильмда рол ўйнашни истамаган, қаҳрамонининг соч турмагини кўргандагина фикридан қайтган. Кўпчилик ўйлаганидек, бу парик эмасди. Шу сабабли актёр кундалик ҳаётда ҳам шу турмакда юриши керак эди. “Сут сотиб олиш учун дўконга чиқсам, ҳамма мендан қўрқарди”, — дейди актёр.
“Титаник” фильмининг актрисалари
Роузнинг онаси ролини ижро этган Френсис Фишернинг айтишича, корсетлар ва каттакон шляпалар актрисаларга суратга олишда жуда кўп муаммо туғдирган. Ҳеч ким бемалол нафас ололмай, ҳатто ўтиролмай қолган. Бундан ташқари, ҳожатхонага бориш муаммо эди. Катта кўйлаклар кўчма кабиналарга сиғмасди, шунинг учун ҳар сафар актрисалар юк машиналарида кийиниш хоналарига олиб кетилган.
Изоҳ (0)