Польша Сейми 2007 йилдан 2022 йилгача мамлакат ички хавфсизлигига Россиянинг таъсирини текшириш учун давлат комиссиясини тузиш тўғрисидаги мунозарали қонун лойиҳасини маъқуллади. 26 май куни парламент қуйи палатасининг 234 нафар депутати қонун лойиҳасини қабул қилиш учун овоз берди, 219 нафари қарши чиқди, яна бири бетараф қолди. Қонун кучга кириши учун уни Польша президенти Анжей Дуда имзолаши керак.
Қонун лойиҳасига кўра, хусусан, тўққиз кишилик комиссия томонидан айбдор деб топилган ҳар қандай сиёсатчига маблағ тақсимоти билан боғлиқ давлат лавозимларини эгаллаш ўн йилга тақиқланиши мумкин. Комиссия раҳбарини бош вазир Матеуш Моравецкий тайинлайди.
“Мухолифатга қарши қонун”
Мухолифат бу қарорни қоралаб, уни сиёсатчиларни судьяга айлантирувчи “конституциявий давлат тўнтариши” деб атади. Танқидчиларнинг фикрича, ушбу қонун ёрдамида ҳукмрон “Қонун ва адолат” партиясининг миллий консерваторлари кузги парламент сайловларида асосий рақиб — либерал мухолифат етакчиси, собиқ бош вазир Дональд Тускни йўқ қилишга интилмоқда. “Ушбу қонуннинг мақсади Тускни сиёсатдан ҳайдашдир”, деганди “Фуқаролик платформаси” партияси бош котиби Марчин Кирвинский.
Европа кенгашининг собиқ президенти Дональд Туск 2007 йилдан 2014 йилгача Польша бош вазири лавозимида ишлаган. Консерваторлар уни бошқа нарсалар қатори Россия билан норентабел газ шартномаларини имзолаганликда айбламоқда. Туск “Қонун ва адолат” партиясининг раҳбари Ярослав Качинскийнинг асосий сиёсий рақиби саналади. Собиқ бош вазир Польшанинг энг йирик мухолифат партияси — либерал-консерватив “Фуқаролик платформаси”ни бошқаради.
Изоҳ (0)