АҚШ Махфий хизмати Байденнинг уйини ўқ ўтказмайдиган қилиб ҳимояламоқда

АҚШ Махфий хизмати давлат раҳбари Жо Байденнинг уйини ўқ ўтказмайдиган қилиш устида ишлаяпти. Бу ҳақда Байден ўзининг бошқа бир қароргоҳи жойлашган Кемп-Девидга (Мериленд штати) учишидан олдин журналистларга айтди, деб хабар бермоқда Оқ уй матбуот хизмати.

“Кемп Девидга боришимнинг сабаби шундаки, Махфий хизматлар ҳозир менинг уйимда ишламоқда ва уйни ўқ ўтказмайдиган қилиб ҳимояламоқда. Шунинг учун уйга бормаяпман. Улар беш ҳафтача қайта олмаслигимни айтишди”, — деди АҚШ президенти.

Байден қайси уйи ҳақида гап кетаётганига аниқлик киритмади. У Кемп-Девидга кетаётганига сабаб набираси 28 май куни ўқишни тамомлаши ва битирув маросимига энг яқин жой ўша ер эканини қўшимча қилди.

АҚШ Махфий хизмати давлатнинг биринчи даражали шахслари ва уларнинг оила аъзоларини ҳимоя қилиш билан шуғулланади.

Америка президентининг бир нечта резиденсиялари бор, лекин асосийси Уилмингтонда (Делавер штати) жойлашган, деб ёзади Politico. Апрель ойида давлат раҳбари журналистларга махфий хизмат ходимлари у ерда ўқ ўтказмайдиган ойналар ўрнатаётганини айтганди.

Делавер — Байден туғилган штат. Президент ва рафиқасининг у ерда иккита уйи бор — Уилмингтон ва Рехобот-Бичда, деб ёзади Newsweek.