АҚШ Украинани Қримдаги нишонларга зарба бериш имконига эга воситалар билан таъминлаш масаласи бўйича ўз позициясини аста-секин юмшатмоқда, деб ёзади The New York Times.
Яриморол Россия томонидан аннексия қилинганидан бери АҚШ Қримни Украина ҳудуди деб таъкидлайди. Бироқ уруш бошланганидан кейин Қўшма Штатлар Киевга яриморолдаги нишонларга зарба бериш воситаларини жўнатишдан бош тортди. NYT ёзишича, ҳарбийлар ва АҚШ президенти маъмуриятининг амалдорлари шахсий суҳбатларда Украина Қуролли кучларининг Қримга зарба бериши мақсадга мувофиқ эмаслигини таъкидлаб, фронтнинг бошқа қисмларидаги нишонларга эътибор қаратиш зарур деб ҳисоблаган.
Энди бўлса муносабат ўзгарган, деб ёзади NYT. Байден маъмурияти агар Украина кучлари Россияни Қрим устидан назоратни қўлдан чиқариш бўйича ташвишга тушира олса, бу келажакдаги ҳар қандай музокараларда Киев позициясини мустаҳкамлайди, деган фикрга келмоқда. АҚШ расмийлари ва экспертлари орасида Россиянинг тактик ядро қуролларини қўллаши ҳақидаги хавотирлар ҳам пасайган, аммо уларнинг фикрича, бундай сценарий хавфи барибир сақланиб қолмоқда.
Мақолада таъкидланишича, Украинани Қримдаги нишонларга зарба беришга қодир масофада учадиган ракеталар билан таъминлаш ҳақида ҳалиям гап йўқ. Аммо Қрим кўприги сингари, яриморолнинг асосий таъминот йўлларига ҳужум қилиш учун HIMARS ёппасига ўт очиш тизимлари ва Bradley зирҳли машиналаридан фойдаланиш имконияти муҳокама қилинмоқда.
8 октябрь куни ярим оролни Россиянинг Краснодар ўлкаси билан боғловчи Қрим кўпригида портлаш содир бўлганди. Кўприкнинг автомобиль қисмида бир неча оралиқлар вайрон бўлган. Россия томони воқеада Украина махсус хизматларини айблади, Киев Қрим кўпригидаги портлашга алоқадорлигини расман тан олмади.
Украина ҳукумати Қримни қайтариш уларнинг мақсади эканини бир неча бор таъкидлаган. Россия расмийлари, ўз навбатида, ярим оролга ҳужумларнинг олдини олиш учун қўлида мавжуд барча воситаларни ишга солишга тайёрлигини маълум қилган.
Изоҳ (0)