Қашқадарё вилоятининг Яккабоғ туманида яшовчи блогер Элмурод Одилов пилла пунктида ИИБ ходимлари томонидан ўласи қилиб калтаклангани, айни пайтда изсиз йўқолгани айтилмоқда. Бу ҳақда “Дарё” манбалари хабар берди.

Манбаларнинг айтишича, блогер ҳоким бошчилигидаги масъулларнинг пилла, сафарбарлик чақируви ва солиқ масалаларига бағишланган йиғилишни ёритишга уринган.

“Уриб телефонларини синдириб ташлашди. Ўша ерда турганлар воқеани телефонига олди. Дарвозадан олиб чиқиб ураётгани, судраб, телефонларини синдираётгани ўша ердаги камерага ҳам тушган бўлиши керак”, — дейди манба.

Манбанинг таъкидлашича, туманда доимий равишда шанба куни шу тарзда йиғилиш ташкил этилади.

“Бизга пилланинг, бир ойлик армия ва солиқнинг нима алоқаси бор, билмаймиз. Ўзимизнинг ишимиз қолиб, шунақа масалаларни муҳокама қилиб юрамиз”, — дейди МФЙ тизимида ишловчи манба.

Блогер калтакланган пайтда воқеа жойида бўлган яна бир манба ИИБ биносидан тонгги 04:00 да қўйиб юборилганини айтмоқда.

“Воқеани кўрдингми деб сўрашди. Мен ичкаридаги воқеани кўрмаганимни айтдим ва эрталаб тонгда уйга қайтдим”, — дейди манба.

“Дарё” мухбирининг аниқлаштиришича, калтакланган блогер катта эҳтимол билан Яккабоғ тумани ҳокими ўринбосари Фозил Хидировнинг ёшлар етакчиларига берган топшириқлари ижросига бағишланган йиғилишни ёритишга уринган. Бироқ, тўсиққа учраган.

Айтилишича, блогер 15 суткага қамалган бўлиши мумкин. Бу ҳақда ҳозирча, расмий ахборот йўқ.