Россия қамоқхонасидан Украинадаги урушга “сафарбар қилинган” 23 ёшли ўзбекистонлик ҳалок бўлди

Ўзбекистон фуқароси Украинадаги жанговар ҳаракатларда қатнашаётган вақтида ҳалок бўлди.

Қайд этилишича, 23 ёшли Ш.Т. оиласини боқиш мақсадида Россияга ишлаш учун кетган. У ерда аввалига салат цехида ишлаган, ёлланма ишчилик билан шуғулланган, қурилишда ишлаган. Сўнгра Ш.Т. Россияда мустақил равишда кафе очиб, ўзига машина олишга муваффақ бўлган.

Онасининг сўзларига кўра, ўғли Россия—Украина чегарасига одам олиб кетаётганда қўлга тушган ва машинасидан героин чиққан. Ш.Т. Россияда қамоқ жазосига ҳукм қилинган. Онасининг айтишича, унинг ўғли жазо муддатини ўтаётиб, қамоқдан Россия Украинада олиб бораётган уруш учун “сафарбар қилинган”.

Аёл ўғли билан охирги марта 10 сентябрь куни суҳбатлашган. “Фарзандим на қурол ушлашни билади, на армия хизматида бўлган”, — дейди марҳумнинг онаси. Аёл ўғлининг жасади (фақатгина белдан тепа қисми) Ўзбекистонга олиб келинганини маълум қилган.

2022 йил августда Россиянинг Перм шаҳридаги ўзбек диаспораси Украина билан урушда Россияни қўллаб-қувватловчи Амир Темур номидаги батальонни тузганди. “Пермдаги Ўрта Осиё ўзбеклари жамияти” қурултойида унинг раҳбари Жаҳонгир Жалолов Россиянинг Украинани демилитаризация қилиш ва деназиялаштириш бўйича махсус ҳарбий операциясини қўллаб-қувватлаш кераклигини таъкидлаган.

Ташқи меҳнат миграцияси агентлиги ҳолатга муносабат билдириб, Ўзбекистон фуқароларидан бундай даъватларга эргашмасликни, зиддиятли ҳудудларга бормаслик ва ҳарбий ҳаракатларда иштирок этмасликни сўраган. Ўзбекистоннинг Россиядаги элчихонаси ҳам ватандошларни хорижий давлатлар ҳудудида кўнгилли батальонлар тузиш ва ёки ҳарбий ҳаракатларда иштирок этмаслик ҳақида огоҳлантирган эди.

Жиноят кодексининг 154−1-моддасига кўра, Ўзбекистон фуқаросининг чет давлатларнинг ҳарбий хизматига, хавфсизлик, полиция, ҳарбий адлия органлари ёки шунга ўхшаш бошқа органларига хизматга кириши базавий ҳисоблаш миқдорининг 300 бараваригача миқдорда жарима ёки 3 йилгача ахлоқ тузатиш ишлари билан жазоланади. Ўзбекистон фуқароси юқоридаги хорижий давлатлар органларига хизматга ёлланса, 3 йилдан 5 йилгача озодликни чеклаш ёхуд 3 йилдан 5 йилгача озодликдан маҳрум қилиш билан жазоланади.