Жиноят ишлари бўйича Қўқон шаҳар судида 2002 йилда содир этилган жиноятнинг яна бир нафар иштирокчисига нисбатан киритилган иш қайта кўриб чиқилди. Бу ҳақда “Замон” информацион дастурида маълум қилинди.
Қайд этилишича, бундан 21 йил олдин қотилликка қўл урган Деҳқонов исмли шахс қўшни давлатлардан бирига қочиб кетган. У ўша пайда таниши Абдужалилов билан 9 ёшли болани ўлдирган.
Маълумотларга кўра, Абдужалилов автомобиль эҳтиёт қисмлари савдоси билан шуғулланувчи холасининг эрини қўлида ишлаб келган. 2001 йил охирига келиб у иш берувчи билан савдо ишларида чиқиша олмай қолган. Яъни почча савдода камомад бўлавергани сабаб Абдужалиловни савдодан четлаштирган.
У холасининг эридан қасос олиш учун тадбиркорнинг ўғлини олиб қочиб, 15 минг доллар талаб қилишни режалаштирган. Бу борада у Деҳқоновга мурожаат қилган. Ўз навбатида Деҳқонов бола қайтариб берилганидан кейин барибир у орқали қўлга тушишларини, бунинг ўрнига болани ўлдириб, унинг отасига руҳий азоб бериш таклифини билдирган.
2002 йил март ойида Абдужалилов жиянини алдаб, танишининг уйига олиб келган ва бу ҳақда жиноий шеригига хабар берган. Улар болани маҳалла четидаги қурилиши тугалланмаган уйнинг ертўласига олиб тушган ва болани сим билан бўғиб ўлдирган.
Шундан сўнг, жиноятчилар бола жасадини қопга солиб, унинг ичини тошлар билан тўлдириб, сув ҳавзасига ташлаб юборган.
Эртасига Деҳқонов яшаш хонадонидан чиқиб кетган. У Тошкентга, пойтахтдан эса Жиззах орқали Қозоғистонга борган. Қозоғистон ҳуқуқ-тартибот органлари ходимлари томонидан қўлга олинган шахс 2022 йилда Ўзбекистон ИИВга топширилган.
Фуқаро Абдужалилов 2002 йил 14 июндаги Фарғона вилоят судининг ҳукми билан жазога тортилган. У белгиланган жазони ўтаб чиқиб, бу сафарги судда гувоҳ сифатида иштирок этган.
Суд ҳукми билан Деҳқонов Жиноят кодексининг 97-моддаси (қасддан одам ўлдириш) билан айбдор деб топилиб, 17 йил муддатга озодликдан маҳрум этилди.
Изоҳ (0)