Табиат ресурслари вазирлиги Тошкент шаҳар бошқармаси Яккасарой туманида узоқ йиллик чинор кесилгани юзасидан маълумот берди.
Ижтимоий тармоқларда Яккасарой ҳокимияти яқинидаги Next савдо маркази олдидаги чинор кесиб ташлангани тасвирланган суратлар тарқалди. Тошкент шаҳар Табиат ресурслари бошқармаси Яккасарой туман инспекцияси томонидан ҳолат ўрганилган.
Унга кўра, Бобур кўчаси Next савдо марказининг олд томонида жойлашган мазкур чинор дарахтлари тана қисми қуригани, яшовчанлик ҳолати мавжуд эмаслиги аниқланиб, Табиат ресурслари бошқармаси мутахассислари томонидан берилган хулосасига кўра, Тошкент шаҳар ободонлаштириш бошқармаси бригадаси томонидан кесиш ишлари амалга оширилган.
Ноқонуний дарахт кесиш ҳолатлари
Бир неча кун олдин Фарғонадаги чегара пости яқинида 12 туп манзарали дарахт қўпориб ташлангани тўғрисида хабар берилганди. Ўзбекистонда 2022 йил давомида дарахт ва буталарнинг ноқонуний кесилиши ортидан табиатга 10 миллиард сўм зарар етказилган. Ўтган йилда жами 1 777 туп қимматбаҳо ва кўп йиллик дарахтлар кесилган. Вазият таҳлил этилганда, қурилиш объектлари атрофини ўраб олиш натижасида дарахтларнинг қаровсиз қолиши, шикастланиши ва нобуд бўлиш ҳолатлари содир этилаётгани аниқланган.