Қашқадарё вилоятининг Ғузор туманида фаолият юритувчи фермер хўжалиги вилоятда биринчи бўлиб, ғалла режасини бажарди ва 110 фоизлик натижани қайд этди. Бу ҳақда “Дарё”га Ғузор тумани ҳокимлиги ахборот хизмати хабар берди.
“Ғузорда ғалла йиғим-терим мавсуми бошланди. Айни пайтда туманнинг Тоҳир ва Зуҳра ҳудудидаги ‘Ашур Норқулов’ фермер хўжалиги ғалла майдонида ўрим-йиғим ишлари олиб борилмоқда. Фермер хўжалиги томонидан 15 гектар ер майдонга ғалла парваришланиб, 45 тонна топширди ва режани 110 фоизга бажарди”, — дейди ҳокимлик ахборот хизмати раҳбари Худойберди Йўлдошев.
“Фермер учун имкониятлар етарли бўлса, ҳосили учун катта нарх тўланса, фермернинг кайфияти ҳам аъло бўлар экан. Ғалла ҳосилини йиғиб олаётган фермер даласида бўлиб, имкон қадар кўмаклашишга ҳаракат қиляпмиз ва кўнгилдагидек натижага эришяпмиз. Насиб этса ғалла мавсумида халқимиз дастурхони учун зарур бўлган донни ўз вақтида йиғиштириб оламиз”, — дейди фермер даласида Комбайн ҳайдаб юрган Ғузор ҳокими Бекзод Суюнов.
Вилоят ҳокимлиги ахборот хизмати раҳбари Аҳрор Содиқовнинг “Дарё”га қўшимча қилишича, вилоятда 2023 йил ҳосили учун 137,5 минг гектар майдонда 6494 та фермер хўжалиги билан фючерс шартномаси асосида бошоқли дон ҳосили етиштирилмоқда.
Изоҳ (0)