Қашқадарё вилояти ИИБ ҳамда ДХХ вилоят бошқармаси ходимлари ҳамкорлигида ўтказилган тезкор тадбирда ноқонуний қурол савдоси билан шуғулланган шахс қўлга олинди. Бу ҳақда “Вазият 24” дастурида маълум қилинди.
Қайд этилишича, 25 апрель куни Қамаши туманида яшовчи 32 яшар фуқаро қўлбола усулда ясаган қурол яшириб қўйилган жойни харидорга айтган. Тезкор гуруҳ томонидан айтилган манзил кўздан кечирилгач, у ердан қўлбола усулда ясалган 16 калибрли ўқотар қурол ва 4 дона патрон топилган.
Қуролни ясаган шахс келишилган 19 миллион сўм ҳамда 100 доллар пулни олаётган вақтда қўлга олинган.
“Оддий трубалар, тунука-пружинадан ясадим шу нарсани. ‘Отиб кўрсатмасанг бўлмайди’, дейишди. Ишлайди деганимда, ‘Отиб кўрсатавер, сендан нима кетди’, деди. Хўп, деб отиб кўрсатдим. Харидор 2 минг доллар бераман деганди. Телефон қилиб, пулни чиқариб юборгани, одами Қамашини билмаслигини, пулни олиб қолишимни айтди”, — дейди гумонланувчи.
Мазкур ҳолат юзасидан қонунбузарга нисбатан Жиноят кодексининг 248-моддаси (ўқотар қуролнинг, ўқ-дориларнинг, ўқотар қурол асосий қисмларининг, портловчи моддаларнинг, портлатиш воситаларининг ёки портлатиш қурилмаларининг қонунга хилоф муомаласи) 3-қисми билан жиноят иши қўзғатилган ва айни пайтда дастлабки тергов ҳаракатлари давом эттирилмоқда. 32 яшар эркак эҳтиёт чораси сифатида қамоққа олинган.
Ўзбекистонда қуролдан фойдаланиш тартиби
Ўзбекистонда “Қурол тўғрисидаги” қонун 2019 йил 29 июлда Президент томонидан имзоланган. Фуқаровий ва хизмат қуроли ҳамда унинг ўқ-дориларини ишлаб чиқариш, таъмирлаш ва реализация қилиш бўйича фаолият фақат Ўзбекистон ҳудудида белгиланган тартибда рўйхатдан ўтган юридик шахслар томонидан амалга оширилади. Ўзбекистонда ноқонуний сақланган қуролларни ўз ихтиёри билан ИИВга топширганларга пул мукофоти берилади.
2022 йилда “Прокуратура тўғрисида”ги қонунга киритилган ўзгартиришларга кўра, прокуратура органлари ходимлари хизмат қуроли ва шахсий ҳимоя воситаларини қонунчиликда белгиланган тартибда сақлаш, олиб юриш ҳамда улардан фойдаланиш ҳуқуқига эгалиги белгиланганди (илгари фақатгина олиб юриши мумкинлиги кўрсатилган).
Изоҳ (0)