Qashqadaryo viloyatining G‘uzor tumanida faoliyat yurituvchi fermer xo‘jaligi viloyatda birinchi bo‘lib, g‘alla rejasini bajardi va 110 foizlik natijani qayd etdi. Bu haqda “Daryo”gа G‘uzor tumani hokimligi axborot xizmati xabar berdi.
“G‘uzorda g‘alla yig‘im-terim mavsumi boshlandi. Ayni paytda tumanning Tohir va Zuhra hududidagi ‘Ashur Norqulov’ fermer xo‘jaligi g‘alla maydonida o‘rim-yig‘im ishlari olib borilmoqda. Fermer xo‘jaligi tomonidan 15 gektar yer maydonga g‘alla parvarishlanib, 45 tonna topshirdi va rejani 110 foizga bajardi”, — deydi hokimlik axborot xizmati rahbari Xudoyberdi Yo‘ldoshev.
“Fermer uchun imkoniyatlar yetarli bo‘lsa, hosili uchun katta narx to‘lansa, fermerning kayfiyati ham aʼlo bo‘lar ekan. G‘alla hosilini yig‘ib olayotgan fermer dalasida bo‘lib, imkon qadar ko‘maklashishga harakat qilyapmiz va ko‘ngildagidek natijaga erishyapmiz. Nasib etsa g‘alla mavsumida xalqimiz dasturxoni uchun zarur bo‘lgan donni o‘z vaqtida yig‘ishtirib olamiz”, — deydi fermer dalasida Kombayn haydab yurgan G‘uzor hokimi Bekzod Suyunov.
Viloyat hokimligi axborot xizmati rahbari Ahror Sodiqovning “Daryo”gа qo‘shimcha qilishicha, viloyatda 2023-yil hosili uchun 137,5 ming gektar maydonda 6494 ta fermer xo‘jaligi bilan fyuchers shartnomasi asosida boshoqli don hosili yetishtirilmoqda.
Izoh (0)