Chevrolet Onix ва Tracker’нинг янгиланган комплектациялари нархи эълон қилинди

UzAuto Motors 25 майдан Tracker ва Onix автомобиль моделларининг янгиланган комплектациялари учун шартнома беришни бошлади. Бу ҳақда компания матбуот хизмати хабар берди. Шу билан бирга, шартнома учун очиқ бўлган аввалги комплектацияларнинг нархи ўзгаришсиз қолган.

25 майдан бошлаб қуйидаги моделларга шартнома расмийлаштириш мумкин:

Chevrolet Tracker (аввалги комплектациялар):

• LS — 211 454 880 сўм;
• LTZ — 231 196 000 сўм;
• Premiyer — 251 142 080 сўм.

Қўшимча опсияларга эга янгиланган комплектациялар:

• LS Plus — 223 824 160 сўм;
• LTZ Plus — 246 981 280 сўм;
• Premiyer Plus — 276 016 160 сўм;
• Redline — 285 834 080 сўм.

Chevrolet Onix (аввалги комплектациялар):

• Premiyer 1 — 207 347 000 сўм;
• Premiyer 2 — 214 748 000 сўм.

Қўшимча опсияларга эга янгиланган комплектациялар:

• Premiyer 2 Plus — 221 640 160 сўм;
• Redline — 230 624 800 сўм.

Қайд этилишича, Chevrolet Tracker ва Onix автомобилларининг барчага таниш комплектацияларида бўлган жамийки асосий опсияларига қўшимча равишда, Plus комплектацияси барча “Иситиш тизими” опсиялари билан, жумладан, рул, олд ва орқа ўриндиқлар (орқа суяниш жойи билан) ён ойналар, олд лабовой ойна иситиш тизими опсиялари билан, шунингдек, қорайтирилган орқа ва орқа ён ойналар, двигатель ҳимоя картери ва қўшимча қулай опсиялар билан жиҳозланади.

“Chevrolet Tracker ва Onix автомобилларининг таниқли Redline комплектацияси ҳам худди аввалгиларидек, ўзига хос дизайни ва қизил чизиқлари билан ажралиб туради”, — дейилади хабарда.

UzAuto Motors май ойи бошида Chevrolet Onix ва Tracker автомобиллари сотувини тўхтатганди. Компания 2022 йилда ҳамёнбоп моделлардан Spark, Nexia, Cobalt ва Lacetti автомобиллари сотувини тўхтатиб, Onix ва Tracker учун шартномалар тузишни бошлаган. Бироқ 2023 йил май ойи бошидан нархи 207 миллион сўмлик Onix ва 211 миллион сўмлик Tracker сотуви тўхтаб қолган.