Трихология-транслпантология соҳаси Ўзбекистонга кириб келганига 10 йил бўлди. Бу янги соҳа эстетик ва саломатлик билан боғлиқ соч тўкилиши, тепакаллик каби муаммолар билан курашади. Соч кўчириб ўтказиш амалиёти кун сайин оммалашиб бормоқда. Хўш, бу қандай амалга оширилади ва кимларга соч кўчириб ўтказиш мумкин эмас? Ушбу саволларга жавоб топиш мақсадида “Дарё“ мухбири Наргиза Юнусова трихолог-трансплантолог Муниса Жўраева билан суҳбат уюштирди.
Қайси ҳолларда соч экиш амалиёти ўтказилади, қайси ҳолатда йўқ?
Аёл ва эркакларда андроген ва чандиқли соч тўкилишларида ҳамда бемор болалигида йирингли, замбуруғли касалликларга чалинган бўлса ҳам соч кўчириб ўтказилади. Чунки тери замбуруғ касалликлари соч илдизини емириб ташлайди. Кейинчалик ўша соҳадан соч ўсиб чиқмайди. Бу ҳолатда ҳам соч кўчириб ўтказиш мумкин. Шунингдек, ёнғин, турли жароҳатлар, йўл-транспорт ҳодисалари, куйиш оқибатида қолган чандиқлар юзага келганда соч экиш амалиёти ўтказилади.
Сочнинг танга-танга шаклида тўкилиши хавфли саналади. Агар бундай ҳолда вақтида чора кўрилмаса, соч тўкилиши кўпайиб, тангачалар бир-бирига қўшилиб, субтотал, тотал ҳамда универсал формага ўтади. Универсал — бу тананинг барча соҳасида тукнинг йўқлиги. Тотал эса бошдаги сочнинг тўкилиб кетиши, қош ва киприкларнинг тўкилиши ҳам бу турга киради. Субтотал эса фақат бошнинг қайсидир соҳасида сочнинг танга-танга шаклида тўкилишидир. Айнан шу шаклдаги соч тўкилиши кузатилган беморлар соч экиш йўли билан муаммони ҳал қилишни истайди. Аммо бу ҳолатда соч экиш амалиёти ўтказилмайди. Боиси соч кўчириб ўтказилганда ҳам янги кўчирилган сочлар қайта ўсиб чиқмайди.
Сочни кўчириб ўтказиш жараёни қандай кечади?
Соч экиш жараёни уч босқичдан иборат. Дастлаб сочлар донар соҳалар — бошнинг энса қисми, эркакларда соқол ва кўкрак соҳаси, қўл ва оёқлардан олинади. Кўпроқ бошнинг энса ва соқол қисмидан олишга ҳаракат қилинади, чунки айнан шу соҳалардан олинган сочларга 50-60 йил кафолат берилади. Тананинг бошқа соҳаларидан олинган сочлар энг кўпи 10 йил хизмат қилади. Кейинги босқич экиладиган сочлар учун дизайни яратилади. Соч йўқ қисмларга чизиқлар чизилиб, сочлар экилиши учун микросунъий каналлар очилади ва энг сўнгги жараён яратилган сунъий каналларга битталаб соч экиб чиқилади. Экиладиган сочлар сони кўп ёки камлигига қараб, экиш жараёни узоғи 5-6 соат давом этади. Шу вақт ичида 5 мингтадан 6 мингтагача соч (граф) кўчириб ўтказилади. 2-3 мингта графни экиш учун эса 2-3 соат етарли ҳисобланади.
Беморга қўйиладиган талаблар
Соч кўчириб ўтказилгандан сўнг 3 кун, яъни 72 соат ўтгач, илдизи билан экилган сочлар қайта ўсишни бошлайди. Бу вақт ичида барча масъулият беморнинг зиммасига тушади. Яъни, қўпол хатти-ҳаракатлар, эҳтиётсизлик оқибатида экилган сочлар тўкилиб кетиш хавфи юқори бўлади. 3 кун ўтганидан кейин соч илдизи терига маҳкам ўрнашиб олгач, боғичлар ечилади ва одатий ҳаёт тарзига ўтилади.
Соч тўкилишини олдини олиш учун нималар қилиш керак? Турли тавсия этилаётган препаратлар ёрдам берадими? Бу саволларга қуйидаги видеони кўриб, саволларингизга батафсил жавоб олинг.
Изоҳ (0)