Шавкат Мирзиёев ижтимоий муассасалар ва давлат идораларида қайта тикланувчи энергия манбаларини жорий этиш ҳолати бўйича тақдимот билан танишди. Бу ҳақда Президент матбуот хизмати хабар берди.
Давлат раҳбарининг шу йил 16 февралдаги қарори билан бу борадаги ишларни жадаллаштириш бўйича дастур қабул қилинган эди. Унга кўра, 2023 йилда ижтимоий соҳа ва давлат идораларида 220 мегаватт қувватли қуёш панеллари ўрнатиш кўзда тутилган.
Йиғилишда мутасаддилар шу борадаги ишларнинг ижроси юзасидан ахборот берган.
Қайд этилишича, бугунги кунда 107 мегаватт қуёш панеллари ўрнатилган. Йирик давлат компанияларида иш яхши кетмоқда. Лекин ижтимоий муассасаларда натижалар ҳали етарли эмас.
Масалан, олий ўқув юрти биноларида 36 фоиз, мактабларда 33 фоиз, тиббиёт муассасаларида 28 фоиз панеллар ўрнатилган. Ҳудудлар бўйича олганда, республикада бу кўрсаткич қарийб 50 фоизга етган. Аммо Тошкент шаҳрида қайта тикланувчи энергия манбаларини ўрнатиш даражаси режага нисбатан 26 фоизни ташкил этмоқда.
Шавкат Мирзиёев бу борада ҳали имкониятлар кўплигини таъкидлаб, ишларни жадаллаштириш бўйича кўрсатмалар берган.
2023 йилда 2 минг мегаватт қувватли қуёш ва шамол электр станциялари ишга туширилиши режалаштирилган. Бундан ташқари, яқинда Ўзбекистон президентининг Хитойга давлат ташрифи доирасида 4,4 миллиард долларлик, жами қуввати 4,8 гигаваттга тенг 11 та қуёш ва шамол станцияларини қуриш бўйича келишувга эришилган.
Йиғилишда мазкур келишувлар ижросини ташкил этиш масалаларига ҳам тўхталиб ўтилган.
Май ўрталарида “Яшил энергия” сертификатлари тизимини жорий этиш чора-тадбирлари тўғрисида”ги президент қарори қабул қилинганди. Битта “яшил энергия” сертификати 1000 кВт/соат электр ишлаб чиқарилганини тасдиқлайди. “Яшил энергия” сертификатлари тизимини юритиш Иқтисодиёт ва молия вазирлиги томонидан амалга оширилади.
Изоҳ (0)