Жаҳон банки иштирокидаги “Ўзбекистон бинолари учун тоза энергия” лойиҳасини амалга ошириш чора-тадбирлари тўғрисидаги президент қарори имзоланди.
Унга кўра ижтимоий соҳа объектларида энергия самарадорлигини ошириш, электр ҳамда иссиқлик энергияси сарфини тежаш, уларни энергия тежайдиган технологиялар ва қайта тикланувчи энергия манбалари қурилмалари билан таъминлаш мақсадида Жаҳон банкидан 143 миллион доллар қарз олинади.
Ушбу қарз 5 йиллик имтиозли давр билан 30 йил муддатга берилади.
Лойиҳада 138 миллион АҚШ доллари жамоат биноларида энергия самарадорлигини ошириш ҳамда тоза энергия учун инвестиция киритишга, яъни қурилиш молларини (иссиқлик изоляция материаллари, қувурлар, эшик ва ойна ромлари, қурилиш материаллари) ва ускуналарини (қайта тикланувчи энергия манабалари қурилмалари, иситиш тизими, иситиш қозонлари ва ҳ.к.) сотиб олиш, қурилиш монтаж ишларига, 5 миллион АҚШ доллари эса лойиҳа доирасида техник кўмак бериш, персоналлар салоҳиятини ошириш ишларига сарфланади.
Ҳужжатга кўра, қарз маблағларини қайтариш манбалари сифатида модернизация қилинган объектларда коммунал хизматларни тўлаш бўйича харажатлар учун маҳаллий бюджетдан ажратиладиган маблағларнинг иқтисод қилинадиган қисми ҳамда иқтисод қилинган маблағларнинг етмаган қисми бўйича давлат бюджети маблағлари белгиланган.
Лойиҳа 2023—2028 йиллар давомида Ўзбекистоннинг барча ҳудудларида амалга оширилади. Энергетика вазирлиги ушбу лойиҳа доирасида мактабгача таълим, халқ таълими ва соғлиқни сақлаш соҳаларида 800 дан ортиқ муассасани модернизация қилиш режалаштирилганини маълум қилганди.
Изоҳ (0)