Украина Ташқи ишлар вазирлиги Венгрия бош вазири Виктор Орбаннинг украиналиклар жанг майдонида ғалаба қозона олмаслиги ҳақидаги баёнотига муносабат билдирди. Бу ҳақда Украина Ташқи ишлар вазирлиги расмий вакили Олег Николенко хабар берди.
Муносабатда келтирилишича, душманга қаршиликсиз таслим бўлиш тарафдорларидан фарқли ўлароқ, украинлар ўз ҳудудлари тўлиқ озод қилинмагунча курашни давом эттиради.
“Венгрия бош вазири Виктор Орбан Россиянинг Украинага бўлган тажовузини изоҳлар экан, ким кимга бостириб киргани муҳим эмаслигини айтди. У Украина урушда ғалаба қозона олмаслигига ишончи комил. Кремль қувониши керак: Венгрия ҳукумати раҳбари Россиянинг Украинага бўлган агрессияси учун жавобгарликни олиб ташлади”, — деди Николенко.
У 2022 йили ўша европалик сиёсатчилар Украинанинг 72 соатдан кўпроқ чидаш имконияти йўқлигини таъкидлаганини эслатди.
“Улар ўшанда хато қилганди ва ҳозир ҳам. Душманга қаршилик кўрсатмасдан таслим бўлиш тарафдорларидан фарқли ўлароқ, украиналиклар ўз ҳудудлари Россия босқинидан тўлиқ озод қилинмагунча курашни давом эттиради. Бу нафақат Украинада тинчликни тиклаш, балки бутун Европа хавфсизлигини кафолатлашнинг ягона йўлидир”, — таъкидлади Украина ТИВ расмийси.
Изоҳ (0)