Бухоро туманида 20 май куни маст фуқаро нотаниш аёлга тегажоғлик қилиб, ички ишлар ходими талабига бўйсунмай, қочишга уринди. Вилоят Ички ишлар бошқармаси ҳолат юзасидан маълумот берди.
Қайд этилишича, соат 10:09 да Жондор тумани “Болун” қишлоғида яшовчи фуқаро К.Г. (аёл) “102” рақамига қўнғироқ қилиб, нотаниш фуқаро унга тегажоғлик қилаётгани тўғрисида хабар берган. Ушбу хабарнома асосида профилактика инспектори воқеа жойига зудлик билан етиб борганида, аёл ва эркак ҳали ҳам ўша ерда бўлган.
Аёлга тегажоғлик қилган ушбу фуқаронинг шахсига ойдинлик киритиш чоралари кўрилган. Унинг Бухоро тумани “Подшоҳи” маҳалласида яшовчи, 1972 йилда туғилган М.Р. экани аниқланиб, спиртли ичимлик истеъмол қилганликда гумон қилинганда, у ўзининг ТТЗ-100 русумли тракторини ходимнинг огоҳлантиришига қарамасдан бошқариб кетмоқчи бўлган.
Ходим унинг маст ҳолда тракторни бошқариши йўл ҳаракати иштирокчилари учун хавф туғдириши мумкинлигини айтиб, унинг транспорт воситасини бошқаришига йўл қўймаслик мақсадида тракторнинг кабинага чиқиш зинасига туриб олиб, қонуний талаб қўйган. Фуқаро М.Р. ходимнинг тракторни бошқармаслик тўғрисида огоҳлантиришига қарамасдан унинг қонуний талабини бажармасдан ҳаракатланиб кетган.
Ушбу фуқаро бошқарувидаги трактор тўхтатилиб, ёрдамга чақирилган вилоят ЙҲХБ ходимлари томонидан текширув ўтказилганда трактор ҳайдовчиси спиртли ичимлик ичган мастлик ҳолатида экани ўз тасдиғини топиб, унга нисбатан Маъмурий жавобгарлик тўғрисидаги кодекснинг 131-моддаси (транспорт воситасини маст ҳолда бошқариш) билан маъмурий баённома расмийлаштирилиб, трактор вақтинчалик сақлаш учун жарима майдончасига жойлаштирилган.
Ҳозирда фуқаро М.Р. нинг ҳаракатларида юқоридаги кодекснинг 194-моддасида кўрсатилган ҳуқуқбузарлик (ИИО ходимининг қонуний талабларини бажармаслик) аломатлари мавжуд ёки мавжуд эмаслиги юзасидан туман ИИБ ходимлари томонидан қўшимча суриштирув ҳаракатлари олиб борилмоқда. Ушбу фуқаро билан ИИО ходими ўртасида бўлиб ўтган ҳолат вақтида ходим хизмат кийимида, ҳушёр ҳолатда, белгиланган тартибда ўз хизмат вазифаларини олиб борган.
Изоҳ (0)