Buxoro tumanida 20-may kuni mast fuqaro notanish ayolga tegajog‘lik qilib, ichki ishlar xodimi talabiga bo‘ysunmay, qochishga urindi. Viloyat Ichki ishlar boshqarmasi holat yuzasidan ma’lumot berdi.
Qayd etilishicha, soat 10:09 da Jondor tumani Bolun qishlog‘ida yashovchi fuqaro K.G. (ayol) “102” raqamiga qo‘ng‘iroq qilib, notanish fuqaro unga tegajog‘lik qilayotgani to‘g‘risida xabar bergan. Ushbu xabarnoma asosida profilaktika inspektori voqea joyiga zudlik bilan yetib borganida, ayol va erkak hali ham o‘sha yerda bo‘lgan.
Ayolga tegajog‘lik qilgan ushbu fuqaroning shaxsiga oydinlik kiritish choralari ko‘rilgan. Uning Buxoro tumani “Podshohi” mahallasida yashovchi, 1972-yilda tug‘ilgan M.R. ekani aniqlanib, spirtli ichimlik iste’mol qilganlikda gumon qilinganda, u o‘zining TTZ-100 rusumli traktorini xodimning ogohlantirishiga qaramasdan boshqarib ketmoqchi bo‘lgan.
Xodim uning mast holda traktorni boshqarishi yo‘l harakati ishtirokchilari uchun xavf tug‘dirishi mumkinligini aytib, uning transport vositasini boshqarishiga yo‘l qo‘ymaslik maqsadida traktorning kabinaga chiqish zinasiga turib olib, qonuniy talab qo‘ygan. Fuqaro M.R. xodimning traktorni boshqarmaslik to‘g‘risida ogohlantirishiga qaramasdan uning qonuniy talabini bajarmasdan harakatlanib ketgan.
Ushbu fuqaro boshqaruvidagi traktor to‘xtatilib, yordamga chaqirilgan viloyat YHXB xodimlari tomonidan tekshiruv o‘tkazilganda traktor haydovchisi spirtli ichimlik ichgan mastlik holatida ekani o‘z tasdig‘ini topib, unga nisbatan Ma’muriy javobgarlik to‘g‘risidagi kodeksning 131-moddasi (transport vositasini mast holda boshqarish) bilan ma’muriy bayonnoma rasmiylashtirilib, traktor vaqtinchalik saqlash uchun jarima maydonchasiga joylashtirilgan.
Hozirda fuqaro M.R. ning harakatlarida yuqoridagi kodeksning 194-moddasida ko‘rsatilgan huquqbuzarlik (IIO xodimining qonuniy talablarini bajarmaslik) alomatlari mavjud yoki mavjud emasligi yuzasidan tuman IIB xodimlari tomonidan qo‘shimcha surishtiruv harakatlari olib borilmoqda. Ushbu fuqaro bilan IIO xodimi o‘rtasida bo‘lib o‘tgan holat vaqtida xodim xizmat kiyimida, hushyor holatda, belgilangan tartibda o‘z xizmat vazifalarini olib borgan.