Мадриднинг “Реал” жамоаси ёзги трансферлар ойнасида фаол бўлмоқчи.
AS нашрининг ёзишича, мадридликлар янги “Бернабеу” очилишигача супер жамоа йиғиш мақсадида, барча чизиқларга футболчилар олиб келиш истагида.
“Реал” Карим Бенземанинг ўрнини босиши мумкин бўлган ҳужумчи билан шартнома имзолашга уриниб кўради. 2024 йил ёзида французнинг “қаймоқранглилар” билан шартномаси ўз ниҳоясига етади, ўша йили клубга ҳужумчи Эндрик келиб қўшилади.
Кейинги ҳафта Флорентино Перес ва Карло Анчелотти ўртасида учрашув бўлиб ўтади, у ерда футболчилар билан битимларни узайтириш масаласи кўриб чиқилади.
Тони Кроос ва Лука Модрич билан янги шартнома борасида келишувга эришилган. Начо ва Дани Себальоснинг келажаги сўроқ остида. Маркос Асенсиога эса ҳозирги берилаётган маош янги битимда такрорланмаслиги мумкин.
“Реал” Ферлан Менди борасидаги таклифларни кўриб чиқишга тайёр. Мариано Диас ва Эден Азарга ҳам чиқиш эшиклари кўрсатилиши мумкин, бироқ белгиялик шунга қарамасдан, клубда қолишни хоҳламоқда.
Учрашувда яна эҳтимолий трансферлар ҳам кўриб чиқилади. “Реал” Тибо Куртуага ёрдамчи сифатида тажрибали дарвозабон излайди. Ўйин амалиётига эга бўлолмаётган Андрей Лунин эса кетишни истамоқда.
Ундан ташқари, “Мадрид” қанот ҳимоячилари, марказий ярим ҳимоячи ва ҳужумчи сотиб олишни мақсад қилган. Рўйхатда Жуд Беллингҳам (“Боруссия Д”), Рис Жеймс (“Челси”) ва Альфонсо Дэвис (“Бавария”) номзодлари бор.
Альфонсо Дэвисга “Манчестер Сити” ҳам қизиқиш билдирмоқда. “Бавария” эса 2025 йил ёзида шартномаси ўз ниҳоясига етадиган Дэвисни сотмаслигини маълум қилган. Мюнхенликлар ҳимоячи билан шартномани узайтирмоқчи.
Ҳужумчи позициясига номзодлар жуда кам. Рандал Коло-Муани (“Айнтрахт”), Виктор Осимҳен (“Наполи”), Душан Влаҳович (“Ювентус”) ва Ҳарри Кейн (“Тоттенҳэм”) каби ҳужумчилар бор, бироқ улар клублари билан амалдаги шартномага эга. Шу сабабли, уларни харид қилиш учун товон пулини ҳам тўлашга тўғри келади.
Ҳозирча бу позицияни Бензема ва “Кастилья” футболчиси Альваро Родригес ёпиб туриши мумкин.
“Қаймоқранглилар” 2024 йилда Килиан Мбаппени олиб келмоқчи. Мадридликлар “ПСЖ” 2023 йилда футболчини сотишга рози бўлмаслигини билиб турибди. Шу сабабдан, “Реал” Мбаппе 2024 йилда шартнома имзолашни асосий мақсад қилиб олган.
Изоҳ (0)