“ПСЖ” футболчиси Лионель Мессига Саудия Арабистони клуби томонидан йилига 500 миллион евродан кўпроқ маошли шартнома таклиф қилинмоқда. Бу ҳақда Cadena SER хабар берди.

Журналист Хауме Рорес саудияликлар катта миқдорда маош таклиф қилганига қарамай, Месси “Барселона”га қайтиши мумкинлигини маълум қилди.

“Фикримча, саудияликлар таклиф қилинаётган маош миқдорини йилига 500 миллион евродан кўпроққа оширганига қарамай, Месси ‘Барселона’га қайтиши мумкин.

Париждаги тажрибаси Месси учун ижобий бўлмади. Криштиану Роналду Саудия Арабистонида нималарни бошидан ўтказаётганини ва қанчалик қийналаётганини ҳамма кўриб турибди.

Лео ҳар доим ‘Барселона’га қайтишни хоҳлашини айтиб келган ва бу муҳим аҳамиятга эга омил ҳисобланади. Қарор май ойида қабул қилинади. Ҳамма томон (клуб, Месси, Ла Лига) буни хоҳламоқда”, — деди журналист.

Май ойи бошида “ПСЖ”нинг мағлубиятидан кейин Месси раҳбарият ва мураббийнинг рухсатисиз Саудия Арабистонига кетиб қолган ва бунинг учун жазоланиб, икки ҳафтага четлатилганди. Парижлик мухлислар клуб офиси ёнида намойиш ўтказиб, Месси, Неймар ва Носир ал-Ҳелайфининг жамоадан кетишини талаб қилганди. Кейинроқ Лео узр сўраб, видеомурожаат йўллади ва “ПСЖ” жазони бекор қилди.

Аввалроқ Мессининг “Ал-Ҳилол”га ўтишида Саудия Арабистони ҳукумати ҳам иштирок этиши мумкинлиги ҳақида хабар берилган. Шунингдек, саудияликлар Леони мамлакатга олиб келиш учун унинг қатор жамоадошларини ҳам таклиф этмоқчи экани маълум бўлганди.

Аргентиналик футболчи 2022/23 йилги мавсумда “ПСЖ” сафида барча турнирларда 38 та ўйин ўтказиб, 20 та гол урди ва 19 та ассистни амалга оширди.