Ҳакамни тепган “Нефтчи W” футболчиси мавсум охиригача дисквалификация қилинди. ЎФА Тартиб-интизом қўмитаси қарорлари эълон қилинди

Ўзбекистон футбол ассоциацияси (ЎФА) Тартиб-интизом қўмитаси 19 май куни навбатдаги қарорларини маълум қилди.

Суперлига 7-тури доирасида ўтган “Сурхон” — “Бунёдкор” учрашувида рақиб оёғига буцининг таг қисми билан зарба бергани учун Термиз клуби футболчиси Асадбек Каримов 3 та ўйинга четлаштирилган.

Мазкур турдаги “Насаф” — “Олимпик” ўйинида меҳмонлар ўйинчиси Шаҳзод Тоиров оёғининг таг қисми билан рақибининг бош қисмига зарба бергани учун 3 та ўйинга дисквалификация қилинган ва жаримага тортилган.

Ушбу тур доирасидаги “Турон” — “Навбаҳор” баҳсида рақибининг тиззасига буцининг таг қисми билан зарба бергани учун наманганликлар футболчиси Жамшид Болтабоев 2 та ўйинга четлатилган.

Шунингдек, қўмита аёллар Олий Лигаси 2-тури доирасидаги “Бухоро W” ва “Нефтчи W” жамоалари ўртасидаги ўйинда юз берган кўнгилсиз ҳолат бўйича ҳам ўз қарорини эълон қилди.

“Нефтчи W” футболчиси Шаҳноза Юсупова учрашувда ён ҳакамга нисбатан ҳақоратли сўзлар ишлатгани учун майдондан четлатилган. Шундан кейин у бош ҳакамнинг орқасидан келиб унинг бош қисмига зарба бергани, бош ҳакам зарбадан сўнг йиқилиб тушгани, шунингдек, бош ҳакамнинг елка қисмига тепгани қайд этилган.

Тартиб-интизом қўмитасининг қарорига кўра, Шаҳноза Юсуповага 2023 йилги мавсумнинг охирига қадар четлаштириш интизом чораси қўлланилди. “Нефтчи” футбол клуби эса жаримага тортилди.

Қайд этиш керак, аёллар Олий Лигасида 6 та тур ўйинлари ортда қолган.